BLOGGER TEMPLATES AND TWITTER BACKGROUNDS

Sunday, June 29, 2014

Burma's Parliament Watch Part (67)

(ပြည်သူ့ခေတ်ဂျာနယ်၊ အတွဲ ၄၊ အမှတ် ၂၀၂၊ ဇွန် ၂၆၊ ၂၀၁၄၊ စာမျက်နှာ ၁၈/၂၂)



မြန်မာနိုင်ငံ၏ ပြည်ထောင်စု လွှတ်တော်ကို အနီးကြည့် အဝေးကြည့်

အောင်ဒင်

အပိုင်း (၆၇) ကိုးကွယ်ရာဘာသာကူးပြောင်းခြင်းဆိုင်ရာ ဥပဒေကြမ်း (မူကြမ်း)

ပြည်ထောင်စုလွှတ်တော် နာယက သူရဦးရွှေမန်းက "မျိုးစောင့်ဥပဒေမူကြမ်းများ ရေးဆွဲစေ" လို့ တာဝန်ပေးလိုက်တာမို့ ဦးသိန်းစိန်အစိုးရက ကော်မရှင်တစ်ရပ်ဖွဲ့စည်းပြီး မျိုးစောင့်ဥပဒေ မူကြမ်းနှစ်ခုကို ရေးဆွဲနေပါတယ်။ အဲဒီ ကော်မရှင်က မေလ (၂၇) ရက်နေ့မှာ "ကိုးကွယ်ရာဘာသာကူးပြောင်းခြင်းဆိုင်ရာ ဥပဒေ (မူကြမ်း)" ကို အစိုးရသတင်းစာမှာ ထုတ်ပြန်ကြေညာပြီး ရဟန်းပြည်သူများရဲ့  အကြံပြုချက်တွေကို ဇွန်လ (၂၀) ရက်နေ့ နောက်ဆုံးထားပြီး ဥပဒေကြမ်းရေးဆွဲရေးကော်မရှင်ထံ တင်သွင်းကြဖို့ ဖိတ်ခေါ်ထားပါတယ်။

ဥပဒေမူကြမ်းကို ဖတ်ကြည့်တော့ အတော်စိတ်မချမ်းသာစရာကောင်းပါတယ်။ "လွတ်လပ်စွာကိုးကွယ်ယုံကြည်ခွင့်"၊ "ကိုးကွယ်ရာဘာသာကို လွတ်လပ်စွာရွေးချယ်ခွင့်"၊ "လွတ်လပ်စွာ ဘာသာကူးပြောင်းကိုးကွယ်ခွင့်" ဆိုတဲ့ အခွင်အရေးဆိုင်ရာ စကားလုံးတွေကို နေရာအနှံ့အပြားမှာ ဖော်ပြထားပေမည့် နောက်ဆုံးတော့ "ကိုးကွယ်ရာ ဘာသာကူးပြောင်းရေးအတွက် အစိုးရကဖွဲ့စည်းတဲ့ မှတ်ပုံတင်ရေးအဖွဲ့ထံမှာ လျှောက်ထားရမယ်" ဆိုပြီး ရှေ့ကဖော်ပြထားတဲ့ လွတ်လပ်ခွင့်များအားလုံးကို ချုပ်နှောင်လိုက်တော့တာပါပဲ။ ဥပဒေမူကြမ်းရဲ့  အနှစ်ချုပ်က (၁) ကိုးကွယ်ရာဘာသာကူးပြောင်းလိုသူတစ်ဦးဟာ အသက် (၁၈) နှစ်ရှိရမယ်ဆိုပြီး အသက်ကို ကန့်သတ်ပါတယ်။ (၂) ကိုးကွယ်ရာဘာသာကူးပြောင်းရေးအတွက် အစိုးရဖွဲ့စည်းတဲ့ မှတ်ပုံတင်ရေးအဖွဲ့ထံ လျှောက်လွှာတင်ရမယ်ဆိုပြီး လွတ်လပ်စွာကိုးကွယ်ခွင့်ကို ကန့်သတ်ပါတယ်။ (၃) မှတ်ပုံတင်ရေးအဖွဲ့ရဲ့ စစ်ဆေးမှုကို ခံယူရမယ်ဆိုပြီး လူတစ်ဦးချင်းစီရဲ့  ကိုယ်ပိုင်ဘာသာရေးကိစ္စမှာ အစိုးရရဲ့ ဝင်ရောက်စွက်ဖက်မှုကို တည်ထောင်ပါတယ်။ (၄) မှတ်ပုံတင်ရေးအဖွဲ့က သတ်မှတ်ပေးတဲ့ ရက်ပေါင်း (၉၀) အတွင်း ကူးပြောင်းလိုတဲ့ ဘာသာအသစ်ရဲ့ အနှစ်သာရ၊ ထိန်းမြားလက်ထပ်ခြင်း၊ ကွာရှင်းပြတ်ဆဲခြင်း၊ ပစ္စည်းခန်းခွဲဝေခြင်း၊ အမွေဆက်ခံခြင်း၊ သားသမီး အုပ်ထိန်းခြင်းဆိုင်ရာ ဓလေ့ထုံးတမ်းများကို လေ့လာကျက်မှတ်မယ်ဆိုပြီး ဘာသာပြောင်းလိုသူကို တွေဝေနှောင့်နှေးစေပါတယ်။ လိုအပ်ရင် ရက်ပေါင်း (၁၈၀) အထိ အချိန်ယူနိုင်တယ်လို့ ဆိုပါတယ်။ (၅) ရက်ပေါင်း ၉၀ ကနေ ၁၈၀ အတွင်း လေ့လာစရာတွေကို လေ့လာပြီး စိတ်အပြောင်းအလဲမရှိပဲ လျှောက်လွှာတင်ထားသလိုပဲ ဘာသာကူးပြောင်းချင်ပါတယ်ဆိုမှ မှတ်ပုံတင်ရေးအဖွဲ့က ကိုးကွယ်ရာဘာသာကူးပြောင်းခြင်းဆိုင်ရာ သက်သေခံလက်မှတ်ထုတ်ပေးမယ်လို့ ဆိုပြီး အစိုးရအာဏာကို ချဲ့ထွင်ပါတယ်။ (၆) မှတ်ပုံတင်ရေးအဖွဲ့က ဘာသာကူးပြောင်းလိုသူဟာ ကိုယ်ပိုင်ဆန္ဒကြောင့်မဟုတ်ပဲ တစ်စုံတစ်ဦး၊တစ်သင်းတစ်ဖွဲ့ရဲ့  ဖိအားပေးမှု၊ ခြိမ်းခြောက်မှုကြောင့် ကူးပြောင်းတာလို့ စစ်ဆေးတွေ့ရှိရင် သက်သေခံလက်မှတ်ကို ထုတ်မပေးပဲ ငြင်းဆန်နိုင်တယ်ဆိုပြီး အစိုးရရဲ့  အာဏာစက်ကို ပိုပြီး ခိုင်မာစေပါတယ်။

အခန်း (၅) မှာ တားမြစ်ချက်များဖြစ်ပြီး ပုဒ်မ (၁၄)၊ မည်သူမျှ ဘာသာသာသနာကို စော်ကားရန်၊ အကြည်ညိုပျက်စေရန်၊ ဖျက်စီးရန်၊ သို့မဟုတ် အလွဲသုံးစားပြုရန်အကြံဖြင့် ကိုးကွယ်ရာဘာသာကူးပြောင်းရေး လျှောက်ထားခြင်းမပြုရ။ ပုဒ်မ (၁၅) မည်သူမျှ သူတစ်ဦးတစ်ယောက်ကို ကိုးကွယ်ရာဘာသာကူးပြောင်းရန် ကြွေးမြီဖြင့် နှောင်ဖွဲ့ခိုင်းစေခြင်း၊ သွေးဆောင်ခြင်း၊ ခြိမ်းခြောက်ခြင်း၊ မလျော်ဩဇာသုံးခြင်း၊ သို့မဟုတ် အနိုင်အထက်ပြုခြင်း မပြုရ။ ပုဒ်မ (၁၆) မည်သူမျှ သူတစ်ဦးတစ်ယောက်၏ ကိုးကွယ်ရာဘာသာ ကူးပြောင်းခြင်းကို ဟန့်တားခြင်း၊ ပိတ်ပင်ခြင်း၊ သို့မဟုတ် နှောင့်ယှက်ခြင်းမပြုရ၊ ဆိုပြီး တားမြစ်ချက်တွေ ရှိပါတယ်။ အဲဒီ တားမြစ်ချက်တွေကို ကျူးလွန်ဖောက်ဖျက်ရင် ကျရောက်မည့် ပြစ်ဒဏ်တွေကို အခန်း (၆) မှာ ဖော်ပြထားပါတယ်။ ပုဒ်မ (၁၄) ကို ချိုးဖောက်ရင် နှစ်နှစ်အထိ ထောင်ဒဏ်ဖြစ်စေ၊ကျပ် နှစ်သိန်းအထိ ငွေဒဏ်ဖြစ်စေ၊ နှစ်မျိုးစလုံးဖြစ်စေ၊ ပုဒ်မ (၁၅) ကို ချိုးဖောက်ရင် တစ်နှစ်အထိ ထောင်ဒဏ်ဖြစ်စေ၊ ကျပ်တစ်သိန်းအထိ ငွေဒဏ်ဖြစ်စေ၊ နှစ်မျိုးစလုံးဖြစ်စေ၊ ပုဒ်မ (၁၆) ကို ချိုးဖောက်ရင် ခြောက်လအထိ ထောင်ဒဏ်ဖြစ်စေ၊ ကျပ် ငါးသောင်းအထိ ငွေဒဏ်ဖြစ်စေ၊ နှစ်မျိုးစလုံးဖြစ်စေ ချမှတ်ခြင်းခံရမည်လို့ ပြဋ္ဌန်းထားပါတယ်။

ဒီလိုနဲ့ ၂၀၀၈ ဖွဲ့စည်းပုံအခြေခံဥပဒေမှာ ပုဒ်မ (၃၄) နဲ့ အကာအကွယ်ပေးထားတဲ့ နိုင်ငံသားများရဲ့  လွတ်လပ်စွာကိုးကွယ်ယုံကြည်ခွင့်ဟာ ဘာသာရေးအစွန်းရောက်ပုဂ္ဂိုလ်များရဲ့  တောင်းဆိုမှုနဲ့ အစိုးရ၊ လွှတ်တော်တို့ရဲ့  အားနည်းမှုကြောင့် အစိုးရရဲ့ ဝင်ရောက်စွက်ဖက်မှုနဲ့ ပြစ်ဒဏ်ကျခံရနိုင်တဲ့ အကြောင်းတရားတစ်ခု ဖြစ်လာပါတော့မယ်။ အာဏာရှင်စစ်အစိုးရတွေလက်ထက်မှာတောင် ဘာသာတရားကိုးကွယ်မှုအပေါ် ကန့်သတ်ချုပ်ချယ်တာ မရှိခဲ့ပဲ အခုလို ဒီမိုကရေစီအသွင်ကူးပြောင်းရေး ဆောင်ရွက်နေပါပြီဆိုတဲ့ ခေတ်ကျမှပဲ နိုင်ငံသားများရဲ့  လွတ်လပ်စွာကိုးကွယ်ယုံကြည်မှုကို ကန့်သတ်ချုပ်ချယ်ဖို့ ကြိုးစားတာကို လူ့အခွင့်အရေးကို မြတ်နိုးတဲ့၊ တန်ဘိုးထားတဲ့ မြန်မာနိုင်ငံသားတိုင်း ကန့်ကွက်ရမှာဖြစ်ပါတယ်။

#ကန့်ကွက်မှုများ၊ ထောက်ခံမှုများ

ဒီဆောင်းပါးရေးနေချိန်မှာ မျိုးစောင့်ဥပဒေ ထောက်ခံသူများဘက်က လှုပ်ရှားမှုတွေ ရှိနေပါတယ်။ "မဘသ" လို့ ခေါ်ကြတဲ့ အမျိုး၊ ဘာသာ၊ သာသနာစောင့်ရှောက်ရေးအဖွဲ့က ဗဟိုအလုပ်အမှုဆောင်တစ်ဦးဖြစ်တဲ့ ဓမ္မစက္ကဦးမောင်မောင် ဆိုသူက ဥပဒေမူကြမ်းတွင်ပါဝင်သည့် ပြစ်ဒဏ်တစ်နှစ် သတ်မှတ်ချက်သည် နည်းလွန်းသောကြောင့် ငါးနှစ်အထိတိုးမြှင့်ရန် အကြံပြုချက်ကို ကော်မရှင်ထံပေးပို့တောင်းဆိုထားသည်ဟု ပြောကြောင်း ဇွန်လ ၁၀ ရက်နေ့ထုတ် မဇ္ဇျိမသတင်းစာမှာ ဖော်ပြပါရှိပါတယ်။ ၎င်းအပြင် ဥပဒေကြမ်းပါ ပြစ်မှုကို ရဲအရေးပိုင်အမှုအဖြစ် သတ်မှတ်ပေးရန်နှင့် အားပေးကူညီသူများကိုလည်း ပြစ်ဒဏ်ပေးရန်၊ ကိုးကွယ်ရာဘာသာကူးပြောင်းလိုသူ၏အသက်ကို (၁၈) နှစ်အစား (၂၀) နှစ်ဟု ပြင်ဆင်သတ်မှတ်ရန်၊ စတဲ့ အချက်တွေကိုလည်း တောင်းဆိုတယ်လို့လည်း သိရပါတယ်။

အရပ်ဖက်လူ့အဖွဲ့အစည်း (၈၁) ဖွဲ့က ဇွန်လ (၁၂) ရက်နေ့မှာ သမ္မတဦးသိန်းစိန်ထံ စာတစ်စောင်ပေးပို့ပြီး ဒီဥပဒေမူကြမ်းကို ဖျက်သိမ်းပေးဖို့ တောင်းဆိုတယ်လို့ သိရပါတယ်။ အဲဒီ အရပ်ဘက်အဖွဲ့အစည်းကိုယ်စားလှယ်များက ဇွန်လ (၁၁) ရက်နေ့မှာ နေပြည်တော်က လွှတ်တော်အဆောက်အအုံမှာ ပြည်သူ့လွှတ်တော် တရားဥပဒေစိုးမိုးရေးနှင့် တည်ငြိမ်အေးချမ်းရေးကော်မီတီဥက္ကဋ္ဌ ဒေါ်အောင်ဆန်းစုကြည်နဲ့ အချိန် နှစ်နာရီကျော် တွေ့ဆုံပြီး သူတို့ရဲ့  ကန့်ကွက်ချက်တွေကို တင်ပြဆွေးနွေးခဲ့တယ်လို့လည်း သိရပါတယ်။ ဒေါ်အောင်ဆန်းစုကြည်ဟာ သူတို့ရဲ့ တင်ပြချက်တွေကို သဘောတူပြီး မျိုးစောင့်ဥပဒေကြမ်းများ အ ပေါ်မှာ စိုးရိမ်ပူပန်မှုရှိတယ်။ ဒါကြောင့် ဒေါ်အောင်ဆန်းစုကြည်ရဲ့  ကော်မီတီကနေပြီး လွှတ်တော်ကို အစီရင်ခံစာတစ်စောင်တင်သွင်းလိမ့်မယ်လို့လည်း ကြားသိရပါတယ်။

အရပ်ဘက်လူ့အဖွဲ့အစည်းများအနေနဲ့ ဒေါ်အောင်ဆန်းစုကြည်ကို အားကိုးပြီး ဒီမျှနဲ့ ကျေနပ်နေလို့ မဖြစ်ပါ။ အစိုးရကော်မရှင်က ရေးဆွဲတဲ့ ဥပဒေကြမ်းကို အစိုးရကိုယ်တိုင်က လွှတ်တော်ကို မတင်ပြတော့ပဲ ဖျက်သိမ်းအောင် ဆက်လက်ကြိုးပမ်းသင့်ပါတယ်။ လွှတ်တော်ထဲကို ဥပဒေကြမ်း ရောက်သွားပြီဆိုရင်ဖြင့် ဖျက်သိမ်းဖို့ ပိုပြီး ခက်ခဲပါလိမ့်မယ်။ လွှတ်တော်ထဲမှာ ဒီမိုကရေစီအင်အားစုဘက်က ကိုယ်စားလှယ်များက အင်အားနည်းလှပြီး ညီညွတ်မှုလည်း မရှိကြပါ။ ဇွန်လ (၁၄) ရက်နေ့ ပြည်သူ့လွှတ်တော်အစည်းအဝေးမှာ သင်္ဃန်းကျွန်းမြို့နယ် လွှတ်တော်ကိုယ်စားလှယ် ဦးသိန်းညွန့်တင်သွင်းတဲ့ ပြည်ပရောက်မြန်မာအလုပ်သမားများကို အကာအကွယ်ပေးသည့် ဥပဒေရေးဆွဲရေးအဆိုကို ထောက်ခံသူက ဦးသိန်းညွန့်အပြင် (၄) ယောက်ပဲရှိပါတယ်။ မျိုးစောင့်ဥပဒေမူကြမ်းတွေ လွှတ်တော်ကို တရားဝင် တင်သွင်းပြီးပြီဆိုရင် လွှတ်တော်ကိုယ်စားလှယ်များက ပြင်းပြင်းထန်ထန် ကန့်ကွက် ဝေဘန်ငြင်းခုန်ကြမယ် မထင်ပါ။ 

အချို့လွှတ်တော်ကိုယ်စားလှယ်များက မျိုးစောင့်ဥပဒေကြမ်းကို သူတို့ကန့်ကွက်ရင် "မဘသ" တွေက နောက်လာမည့် ရွေးကောက်ပွဲမှာ သူတို့မဲမရအောင် ဆန့်ကျင်မှာကို ကြောက်ရွံ့ကြပါလိမ့်မယ်။ အချို့က မဘသနဲ့ တစ်ဘက်တည်း၊ ပေါင်းစည်းပြီးသားဖြစ်ပါတယ်။ အများစုက တတ်နိုင်သလောက် ခေါင်းရှောင်ကြပါလိမ့်မယ်။ ဒီလိုနဲ့ အဲဒီဥပဒေကြမ်းကို "သည်၊ ၏၊ ကို၊ မှ၊ ဖြင့်၊ နှင့်" စတဲ့ စကားလုံးနောက်ဆက်လေးတွေပဲ ပြင်ဆင်ပြီး အတည်ပြုကြမှာပါ။ ဥပဒေတစ်ခု အတည်ဖြစ်သွားပြီးရင် ပြင်ဆင်ဖို့၊ ဖျက်သိမ်းဖို့ အင်မတန်ခက်ခဲလှပါတယ်။

ဒါပေမည့် အရပ်ဘက်လူ့အဖွဲ့အစည်းများရဲ့  မျိုးစောင့်ဥပဒေကန့်ကွက်ရေးလှုပ်ရှားမှုဟာ ပြည်တွင်းလှုပ်ရှားမှုသက်သက်ဖြစ်ဖို့လိုအပ်ပြီး ပြည်ပပယောဂ ကင်းစင်သင့်ပါတယ်။ ဧရာဝတီသတင်းဋ္ဌာနရဲ့  ဖော်ပြချက်အရ အစိုးရထံ ကန့်ကွက်စာမှာ ပူးတွဲလက်မှတ်ရေးထိုးကြတဲ့ အဖွဲ့အစည်း (၈၁) ဖွဲ့မှာ Fortify Rights နဲ့ Physicians for Human Rights စတဲ့ ပြည်ပအဖွဲ့အစည်းများလည်း ပါဝင်တယ်လို့ သိရပါတယ်။ မဖြစ်သင့်ပါ၊  မျိုးစောင့်ဥပဒေကန့်ကွက်ရေးလှုပ်ရှားမှုဟာ မြန်မာနိုင်ငံသားများ၊ နိုင်ငံသားအဖွဲ့အစည်းများရဲ့  နိုင်ငံသားအခွင့်အရေးလှုပ်ရှားမှုကြီး (Civil Rights Movement) ဖြစ်ပါတယ်။ နိုင်ငံခြားအဖွဲ့အစည်းများနဲ့ ပူးတွဲလှုပ်ရှားခြင်းဖြင့် နိုင်ငံသားအခွင့်အရေးလှုပ်ရှားမှုကြီးရဲ့ တန်ဘိုးနဲ့ သိက္ခာလျော့နည်းကျဆင်းနိုင်ပါတယ်။

#ဘာသာရေးလွတ်လပ်ခွင့်နှင့် အမေရိကန်ပြည်ထောင်စု

လွတ်လပ်စွာကိုးကွယ်ယုံကြည်ခွင့်ဆိုတာဟာ ၁၇ ရာစုအတွင်းက စပိန်၊ ဟော်လန်၊ အင်္ဂလန်၊ ဂျာမဏီ စတဲ့ ဥရောပနိုင်ငံများက ပြည်သူတွေ အန္တရာယ်ကြီးမားပြီး ရှည်လျားလွန်းလှတဲ့ ရေကြောင်းခရီးနဲ့ အမေရိကတိုက်ကို ထွက်ပြေးအခြေချကြခြင်းရဲ့  အဓိကအကြောင်းရင်း တစ်ရပ်ဖြစ်ပါတယ်။ အဲဒီ ဥရောပနိုင်ငံများက အုပ်ချုပ်သူ ဘုရင်များဟာ ပြည်သူလူထုရဲ့  ကိုးကွယ်ယုံကြည်မှုအပေါ် အကြီးအကျယ်ကန့်သတ်မှုတွေ လုပ်ပါတယ်။ ပြည်သူလူထုဟာ ဘုရင်က ကောင်းချီးပေးတဲ့ ဘုရားကျောင်းမှာသာ ဘုရင်ညွှန်ကြားတဲ့ ပုံစံအတိုင်း ကိုးကွယ်ဝတ်ပြုရပါတယ်။ ခရစ်ယန်ဘာသာရေးခေါင်းဆောင်များက အုပ်ချုပ်သူ ဘုရင်များအပေါ် လွှမ်းမိုးပြီး တိုင်းပြည်ကိုအုပ်ချုပ်နေတာမို့ ပြည်သူလူထုမှာ လွတ်လပ်စွာကိုးကွယ်ခွင့်မရှိခဲ့ပါ။ ၁၆၂၀ ခုနှစ်မှာ ပထမဆုံး ဥရောပတိုက်က လွတ်လပ်စွာကိုးကွယ်ယုံကြည်လိုတဲ့ ဘုရားဖူးခရီးသည်များ အမေရိကတိုက်ကို စတင်ရောက်ရှိခဲ့ပါတယ်။ ဒါကြောင့် လွတ်လပ်စွာကိုးကွယ်ယုံကြည်ခွင့်ဟာ အမေရိကန်ပြည်ထောင်စုကို စတင်တည်ထောင်သူများ ဖွဲ့စည်းပုံအခြေခံဥပဒေရေးဆွဲကြတဲ့အခါ အလေးအနက်ထည့်သွင်းစဉ်းစားရတဲ့ အချက်တစ်ချက်ဖြစ်ပါတယ်။ 

အမေရိကန်ပြည်ထောင်စု ဖွဲ့စည်းပုံအခြေခံဥပဒေကို ၁၇၈၇ ခုနှစ်မှာ ပြဋ္ဌန်းအတည်ပြုခဲ့ပြီး (၄) နှစ်အကြာ ၁၇၉၁ ခုနှစ်မှာ "နိုင်ငံသားများ၏ မွေးရာပါ ရပိုင်ခွင့်များ" (Bill of Rights) လို့ ကြော်ကြားတဲ့ ပြင်ဆင်ချက် (၁၀) ခုကို ပြဋ္ဌန်းအတည်ပြုခဲ့ပါတယ်။ ပထမဆုံးပြင်ဆင်ချက် (First Amendment) သို့မဟုတ် ပထမဆုံးသတ်မှတ်တဲ့ အခွင့်အရေးများက "လွတ်လပ်စွာကိုးကွယ်ယုံကြည်ခွင့်၊ လွတ်လပ်စွာရေးသားခွင့်၊ လွတ်လပ်စွာဟောပြောခွင့်၊ လွတ်လပ်စွာစုဝေးခွင့်၊ လွတ်လပ်စွာ အစိုးရထံ နစ်နာမှုများဖြေရှင်းပေးရန်တောင်းဆိုခွင့်များ" ဖြစ်ကြပါတယ်။ အဲဒီ ပထမပြင်ဆင်ချက်က ကွန်ဂရက်လွှတ်တော်က အဆိုပါ အခြေခံအခွင့်အရေးများကို ကန့်သတ်ချုပ်ချယ်မည့် ဘယ်လိုဥပဒေကိုမှ မပြဋ္ဌန်းရလို့ ပိတ်ပင်ထားပါတယ်။
အမေရိကန်ပြည်ထောင်စု ဖွဲ့စည်းပုံရေးဆွဲသူများက အစိုးရက ပြည်သူလူထုရဲ့ အခြေခံအခွင့်အရေးများကို ကန့်သတ်ချုပ်ချယ်မှာကို တွေးပြီး ပူပင်ခဲ့ကြပါတယ်။ ဒါကြောင့်မို့ ဖွဲ့စည်းပုံအခြေခံဥပဒေမှာ အစိုးရက အခြေခံလူ့အခွင့်အရေးများကို ကန့်သတ်ချုပ်ချယ်ခွင့်မရှိအောင်၊ ဥပဒေပြုလွှတ်တော်က အခြေခံလူ့အခွင့်အရေးများကို ကန့်သတ်ချုပ်ချယ်တဲ့ ဥပဒေတွေ မပြဋ္ဌာန်းနိုင်အောင် ပြင်ဆင်ချက်များအဖြစ်နဲ့ ထည့်သွင်းရေးဆွဲပေးခဲ့ပါတယ်။

#နိုင်ငံသားအခွင့်အရေးလှုပ်ရှားမှု

ဘာသာရေးအစွန်းရောက်များ၊ မျိုးချစ်စိတ်လွန်ကဲသူများက အမျိုး၊ ဘာသာ၊ သာသနာအလံထောင်ပြီး ဘာသာရေးနဲ့ နိုင်ငံရေးကိုရောထွေးဖို့၊ ဘာသာရေးက နိုင်ငံရေးကို လွှမ်းမိုးဖို့၊ ပြည်သူလူထုရဲ့  အခွင့်အရေးတွေကို ဘာသာရေးအကြောင်းပြပြီး ကန့်သတ်ချုပ်ချယ်ဖို့ ကြိုးစားနေကြတဲ့အချိန်မှာ မြန်မာနိုင်ငံကို ဘာသာရေး၊ လူမျိုးရေးအစွန်းရောက်များရဲ့  ထောင်ချောက်ထဲမရောက်အောင် ကယ်တင်ဖို့ဆိုတာ ဒီမိုကရေစီမြတ်နိုးသူများ၊ လူ့အခွင့်အရေးကာကွယ်စောင့်ရှောက်သူများ အားလုံးရဲ့  တာဝန်ဖြစ်ပါတယ်။ ဒါဟာဖြင့် မြန်မာနိုင်ငံရဲ့  "နိုင်ငံသားအခွင့်အရေးလှုပ်ရှားမှုကြီး" (Civil Rights Movement) ဖြစ်ပါတယ်။ နိုင်ငံသားအခွင့်အရေးလှုပ်ရှားမှုကြီး ဆင်နွှဲရာမှာ ဒီမိုကရေစီမြတ်နိုးသူများ၊ လူ့အခွင့်အရေးကာကွယ်စောင့်ရှောက်သူများဟာ ဘာသာရေး၊ လူမျိုးရေးအစွန်းရောက်များရဲ့  တိုက်ခိုက်မှု၊ ရန်လိုမှု၊ စော်ကားမှုတွေကို ရင်ဆိုင်ရပါလိမ့်မယ်။ အကြမ်းမဖက် ရှောင်လွှဲနိုင်ဖို့ လိုအပ်ပါတယ်။ ရန်ကို ရန်ချင်း မတုန့်ပြန်ဖို့ လိုအပ်ပါတယ်။ လွှတ်တော်ကိုယ်စားလှယ်များကို တွေ့ဆုံဆွေးနွေးပြီး ဥပဒေမပြုရေး တောင်းဆိုဖိအားပေးဖို့ လိုအပ်ပါတယ်။ အစိုးရကိုလည်း ဥပဒေမူကြမ်းကို ရုပ်သိမ်းဖို့ ဖိအားပေးရပါမယ်။ ပြည်သူလူထု၊ အထူးသဖြင့် လူငယ်နဲ့ အမျိုးသမီးများကို ဘာသာပေါင်းစုံ၊ လူမျိုးပေါင်းစုံ ငြိမ်းချမ်းစွာအတူယှဉ်တွဲနေထိုင်ရေးနဲ့ မတူကွဲပြားမှုများ ညီညွတ်မှုနဲ့ နိုင်ငံတော်တည်ဆောက်ရေး ပညာပေးဖို့ လိုအပ်ပါတယ်။ 
တစ်ချိန်တည်းမှာပဲ နိုင်ငံတော်ဖွဲ့စည်းပုံအခြေခံဥပဒေ ပြင်ဆင်ရာမှာ နိုင်ငံသားအခွင့်အရေးများအတွက် အပြည့်အဝအာမခံချက်တွေကို ပြင်ဆင်ချက်များအဖြစ် ထည့်သွင်းရေးဆွဲဖို့ လွှတ်တော်ကိုယ်စားလှယ်များကို တောင်းဆိုနေကြရမှာပါ။

ဒါဟာဖြင့် ရေတိုလှုပ်ရှားမှု မဖြစ်နိုင်ပါ။ အစိုးရကိုယ်တိုင်က မဘသကို ကြောက်ရွံ့အလိုလိုက်နေပုံရပြီး ပြည်ထောင်စုလွှတ်တော်မှာလည်း မဘသကို ရွေးကောက်ပွဲမှာ မဲရဖို့အတွက် အားကိုးနေပုံရတဲ့ ကြံ့ခိုင်ရေးပါတီက အများစုဖြစ်တာကြောင့် အများပြည်သူ ကန့်ကွက်နေတဲ့ ကြားက မျိုးစောင့်ဥပဒေကြမ်းတွေ လွှတ်တော်ကို ရောက်ရှိလာပြီး လွှတ်တော်ကိုယ်စားလှယ်အများစုက ထောက်ခံလို့ ဥပဒေအဖြစ် အတည်ဖြစ်လာနိုင်ပါတယ်။ ဥပဒေဖြစ်လာတဲ့ နောက်ပိုင်းမှာလည်း ဆက်ပြီး ဆန့်ကျင်ကန့်ကွက်ရမှာပါ။ ပြည်ထောင်စုလွှတ်တော်ထဲမှာ လူ့အခွင့်အရေးတန်ဘိုးထားတတ်သူတွေ အရေအတွက်များများ အရွေးချယ်ခံရအောင် စည်းရုံးလှုံ့ဆော်ရင်း မျိုးစောင့်ဥပဒေတွေရဲ့  အာဏာသက်ရောက်မှုတွေကိုလည်း ဖီဆန် ဆန့်ကျင့်ရမှာပါ။
မြန်မာနိုင်ငံရဲ့  နိုင်ငံသားအခွင့်အရေးလှုပ်ရှားမှုကြီးကို လူ့အခွင့်အရေးကို လေးစားတန်ဘိုးထားတဲ့  နိုင်ငံတကာအစိုးရများ၊ နိုင်ငံတကာအဖွဲ့အစည်းများက အားပေးထောက်ခံကြပါလိမ့်မယ်။ ဒါပေမည့် မြန်မာ့အရပ်ဘက်လူ့အဖွဲ့အစည်းများက ပြည်ပအဖွဲ့အစည်းများနဲ့ ပူးတွဲကြေညာချက်ထုတ်တာ၊ ပူးတွဲလှုပ်ရှားတာ၊ ပူးတွဲဆန္ဒပြတာ၊ ပူးတွဲလက်မှတ်ရေးထိုးတာတွေတော့ ရှောင်သင့်ပါတယ်။  နိုင်ငံတကာအစိုးရများ၊ နိုင်ငံတကာအဖွဲ့အစည်းများအနေနဲ့ မြန်မာအစိုးရနဲ့ လွှတ်တော်ကို တိုက်ရိုက်ဆက်ဆံပြီး မျိုးစောင့်ဥပဒေများကို ကန့်ကွက်နိုင်ပါတယ်။ ဒါပေမည့် ပြည်တွင်းအဖွဲ့အစည်းများကို လှုပ်ရှားမှုကို ဝင်ရောက်ပြီး အရိပ်မမိုးသင့်ပါ။

အောင်ဒင်
ဇွန် ၁၅၊ ၂၀၁၄

Saturday, June 28, 2014

Book Launch


Tuesday, June 17, 2014

American Poet Maya Angelou


(စုံနံ့သာ စာပေ၊အနုပညာမဂ္ဂဇင်း၊ အတွဲ ၁၊ အမှတ် ၆၊ ဇွန်လ၊ ၂၀၁၄)



လှောင်အိမ်ထဲကငှက် (သို့မဟုတ်) အမေရိကန်ကဗျာဆရာမကြီး မာယာအိန်ဂျလို (Maya Angelou)

အောင်ဒင်

၂၀၁၄ ခုနှစ်၊ မေလ (၂၈) ရက်နေ့မှာ အမေရိကန်ပြည်ထောင်စုရဲ့  ထင်ရှားတဲ့ ကဗျာဆရာမကြီး မာယာအိန်ဂျလို (Maya Andelou) ကွယ်လွန်သွားပါတယ်။ ၁၉၂၈ ခုနှစ်၊ ဧပြီလ ၄ ရက်နေ့မှာ မွေးဖွားသူမို့ ကွယ်လွန်ချိန်မှာ အသက် ၈၆ နှစ်ရှိပါပြီ။ သူကွယ်လွန်တာနဲ့ ပါတ်သက်ပြီး သမ္မတ ဘားရက်အိုဘားမားက ကြေညာချက်တစ်စောင်ထုတ်ပြန်ပါတယ်။ အဲဒီ ကြေညာချက်မှာ အိုဘားမားက "မစ်ရှယ်လ် (သူ့ဇနီး) နဲ့ ကျနော်ဟာ ဒီကနေ့မှာ ကျနော်တို့ခေတ်ရဲ့ အတောက်ပဆုံး အလင်းရောင်တစ်ခုကို သတိရလွမ်းဆွတ်နေကြတဲ့ သန်းပေါင်းများစွာသော ကမ္ဘာပြည်သူများနဲ့ အတူတကွရှိနေပါတယ်" လို့ ဆိုပါတယ်။ အိုဘားမားက မာယာအိန်ဂျလိုကို “အထူးချွန်ဆုံး စာရေးဆရာမကြီး၊ အခိုင်မာဆုံးသော မိတ်ဆွေ၊ အမှန်တကယ်ကို အံ့ဩစရာကောင်းတဲ့ အမျိုးသမီးကြီး" လို့ ချီးကျူးပြီး မာယာအိန်ဂျလိုရဲ့ လွှမ်းမိုးမှုကြောင့် အိုဘားမားရဲ့  အမေက သူ့သမီး၊ အိုဘားမားရဲ့  အမကို မာယာလို့ အမည်ပေးခဲ့တယ်လို့ ဆိုပါတယ်။

မာယာအိန်ဂျလိုဟာ အမေရိကန်ပြည်ထောင်စုရဲ့  အလွန်ကြီးမြတ်သော အမျိုးသမီးကြီးဖြစ်ပါတယ်။ သူ့ဟာ ကဗျာဆရာမကြီးအဖြစ်သာမက စာရေးဆရာ၊ အဆိုတော်၊ သမိုင်းပညာရှင်၊ သီချင်းရေးစပ်သူ၊ ပြဇာတ်ရေးသူ၊ တက္ကသိုလ်ပါမောက္ခ၊ မဂ္ဂဇင်းအယ်ဒီတာ၊ ကချေသည်၊ ပြဇာတ်ထုတ်လုပ်သူနဲ့ ရုပ်ရှင်ဒါရိုက်တာ၊ နိုင်ငံသားအခွင့်အရေးလှုပ်ရှားသူ (Civil Rights Activist) လည်း ဖြစ်ပါတယ်။ သူဖြတ်သန်းခဲ့ရတဲ့ ကာလဟာ အမေရိကန်ပြည်ထောင်စုမှာ လူမည်းတွေကို လူဖြူတွေက နှိမ့်ချဆက်ဆံတဲ့ ကာလဆိုးကြီးဖြစ်ပါတယ်။ ဒါကြောင့်လည်း လူမည်းအမျိုးသမီးတစ်ဦးဖြစ်တဲ့ မာယာအိန်ဂျလို ဟာ ဒေါက်တာမာတင်လူသာကင်းဦးဆောင်တဲ့ နိုင်ငံသားအခွင့်အရေးလှုပ်ရှားမှုကြီး (Civil Rights Movement) မှာ ဦးဆောင်မှုအခန်းကဏ္ဏက ပါဝင်ခဲ့သူလည်း ဖြစ်ပါတယ်။ သူဖန်တီးထုတ်လုပ်တဲ့ အနုပညာပစ္စည်းတွေမှာလည်း အသားအရောင်ခွဲခြားမှုကို ဆန့်ကျင်တဲ့ အတွေးအခေါ်တွေ၊ တရားမျှတမှုကို တောင်းဆိုတာတွေ၊ ခွဲခြားနှိမ့်ချခံကြရသူများရဲ့ ငိုကျွေးသံတွေကို ကိုယ်စားပြု တင်ပြခဲ့ပါတယ်။ ၁၉၉၃ ခုနှစ်မှာ သမ္မတ ကလင်တန်ရဲ့  ကျမ်းသစ္စာကျိန်ဆိုပွဲမှာ ကလင်တန်ရဲ့  မေတ္တာရပ်ခံချက်အရ "မနက်ခင်းရဲ့  သွေးခုန်သံအကြောင်း" (On the Pulse of the Morning) ဆိုတဲ့ ကဗျာကို ရွတ်ဖတ်ခဲ့ပါတယ်။ 


၂၀၁၀ ခုနှစ်မှာ သမ္မတ အိုဘားမားက အမေရိကန်ပြည်ထောင်စုမှာ အရပ်သားများကို ချီးမြှင့်တဲ့ အမြင့်ဆုံးဆုတံဆိပ်ဖြစ်တဲ့ "သမ္မတ၏ လွတ်လပ်ရေးဆုတံဆိပ်" (Presidential Medal of Freedom) ကို မာယာအိန်ဂျလိုကို သမ္မတအိမ်ဖြူတော်မှာ အခန်းအနားနဲ့ ချီးမြှင့်ဂုဏ်ပြုခဲ့ပါတယ်။


 မာယာအိန်ဂျလိုရဲ့  ၁၉၆၉ ခုနှစ်မှာ ထုတ်ဝေတဲ့ "လှောင်အိမ်ထဲက ငှက် ဘာကြောင့်သီချင်းဆိုသလဲဆိုတာ ငါသိပြီ" (I Know Why the Caged Bird Sings) ဆိုတဲ့ စာအုပ်ဟာ အထူးထင်ရှားပါတယ်။ ၂၀ ရာစုနှစ်များရဲ့ လူမည်းအမျိုးသမီးတစ်ယောက်အဖြစ် သူ့ဘဝဖြတ်သန်းမှုကို သီချင်းဆန်ဆန်ဖွဲ့ထားတဲ့ ကဗျာတွေပါဝင် မှတ်တမ်းတင်ထားတဲ့ ကိုယ်ရေးအထုပ္ပတ္တိစာအုပ်ဖြစ်ပြီး ကျောင်းတွေမှာ အမေရိကန်စာပေနဲ့ ပါတ်သက်တဲ့ သင်ရိုးညွှန်းတမ်းမှာ သင်ကြားရတဲ့ စာအုပ်တစ်အုပ်ဖြစ်လာပါတယ်။ မာယာအိန်ဂျလိုဟာ အာဖရိကန် ကဗျာဆရာကြီး ပေါလ်လောရဲန်စ် ဒမ်ဘာ (Paul Laurence Dunbar) ကို ကြည်ညိုသူဖြစ်ပြီး သူ့စာအုပ်ရဲ့ ခေါင်းစဉ် (I Know Why the Caged Bird Sings) ဟာ ပေါလ်ရဲ့  ကဗျာတစ်ပုဒ်ထဲက စာသားဖြစ်ပါတယ်။အမေရိကန်ပြည်ထောင်စုမှာ အသားအရောင်ခွဲခြားမှု ပြင်းထန်ချိန်၊ အသားအရောင်ခွဲခြားဆက်ဆံရာမှာ အဆိုးဆုံးဖြစ်တဲ့ အမေရိကန်ပြည်ထောင်စု တောင်ပိုင်းမှာ မွေးဖွားကြီးပြင်းခဲ့ရသူမို့ သူ့ရဲ့  အနုပညာပစ္စည်းတွေမှာ လူ့အသိုင်းအဝိုင်းများမှာ ကျား၊ မလိင်ကွဲပြားမှုအပေါ် ခွဲခြားဆက်ဆံခြင်းနဲ့ အသားအရောင်အပေါ်ခွဲခြားဆက်ဆံခြင်းများကို ဆန့်ကျင်ဝေဘန်တာတွေ အမြဲတွေ့ရမှာပါ။ 

ဒီဆောင်းပါးမှာ သူ့ရဲ့  ကဗျာ (၃) ပုဒ်ကို ဘာသာပြန်ပြီး တင်ပြပါမယ်။ ကျေနပ်ဖွယ်ရာမဟုတ်ရင် ဘာသာပြန်သူရဲ့  အားနည်းချက်ကြောင့်သာ ဖြစ်ပါလိမ့်မယ်။

အောက်ပါ "လှောင်အိမ်ထဲက ငှက်" ကဗျာဟာ ၁၉၆၉ ခုနှစ်မှာ ထုတ်ဝေတဲ့ မာယာအိန်ဂျလိုရဲ့ "လှောင်အိမ်ထဲက ငှက် ဘာကြောင့်သီချင်းဆိုသလဲဆိုတာ ငါသိပြီ" စာအုပ်ထဲမှာ ပါဝင်တဲ့ ကဗျာတစ်ပုဒ်ဖြစ်ပါတယ်။

# လှောင်အိမ်ထဲက ငှက် (Caged Bird)

မာယာအိန်ဂျလို

လွတ်လပ်တဲ့ ငှက်တစ်ကောင်ဟာ
လေကို ဆန်ပြီး ကျော်လွှားပျံသန်းတယ်
စမ်းချောင်းကလေးထဲမှာ
လှိုင်းတွေရဲ့အဆုံးအထိ မျောပါတယ်
နေရဲ့ လိမ္မော်ရောင် အလင်းတန်းတွေထဲ
အတောင်ပံတွေကို နှစ်မြုတ်ပြီး
ကောင်းကင်ကြီးကို သူပိုင်ဆိုင်တယ်လို့ ကြွေးကြော်ရဲတယ်။

ဒါပေမည့်
ကျဉ်းမြောင်းသေးငယ်တဲ့ လှောင်အိမ်တစ်ခုထဲ
ခက်ခက်ခဲခဲ လမ်းလျှောက်နေရတဲ့ ငှက်တစ်ကောင်ကိုတော့
ဒေါသသံတိုင်များကို ဖောက်ထွင်းပြီး
ထင်ထင်ရှားရှားမြင်တွေ့နိုင်ဖို့ ခက်ပါလိမ့်မယ်
သူ့ရဲ့ တောင်ပံတွေ ဖြတ်တောက်ခံရ
သူရဲ့ ခြေအစုံဟာ ချည်နှောင်ခံရ
ဒါကြောင့်ပဲ သီချင်းဆိုဖို့ သူ့လည်ချောင်းကို ဖွင့်ဟလိုက်တယ်။

မသိနိုင်တဲ့အရာတွေကို
ကြောက်ရွံ့တဲ့ သံစဉ်နဲ့
လှောင်အိမ်ထဲကငှက် တေးသီဖွဲ့တယ်
မလှုပ်မယှက်နဲ့ လွမ်းတယ်
သူ့သီချင်းသံကို
အဝေး တောင်တန်းကြီးတွေကတောင် ကြားရတယ်
လှောင်အိမ်ထဲက ငှက်မို့
သူဆိုတဲ့တေးဟာ လွတ်လပ်ရေးပေါ့။

လွတ်လပ်တဲ့ငှက်က
နောက်ထပ် လေပြေလေညှင်းအကြောင်းကို တွေးတယ်
သစ်ပင်တွေကြား နူးနူးညံ့ညံ့ဖြတ်သန်းလာတဲ့ ကုန်သည်လေကို တွေးတယ်
အာရုဏ်ဦးရဲ့  တောက်ပမှုနဲ့အတူ
မြက်ခင်းပြင်ပေါ်မှာ စောင့်ဆိုင်းနေမည့် ပိုးကောင်
ဝဝလေးတွေကို တွေးတယ်
ကောင်းကင်ကြီးကို သူပိုင်တယ်တဲ့။

လှောင်အိမ်ထဲက ငှက်ကတော့
အိပ်မက်တွေ ကုန်ဆုံးမြှုပ်နှံရာ အရပ်မှာ
ညနက်သန်းခေါင် ခြောက်လှန့်မှုတွေကြောင့်
သူ့အရိပ်ကတောင် အော်ဟစ်ငိုကျွေးမိ
ဒါကြောင့်ပဲ သီချင်းဆိုဖို့ သူ့လည်ချောင်းကို ဖွင့်ဟလိုက်တယ်။

မသိနိုင်တဲ့အရာတွေကို
ကြောက်ရွံ့တဲ့ သံစဉ်နဲ့
လှောင်အိမ်ထဲကငှက် တေးသီဖွဲ့တယ်
မလှုပ်မယှက်နဲ့ လွမ်းတယ်
သူ့သီချင်းသံကို
အဝေး တောင်တန်းကြီးတွေကတောင် ကြားရတယ်
လှောင်အိမ်ထဲက ငှက်မို့
သူဆိုတဲ့တေးဟာ လွတ်လပ်ရေးပေါ့။

အောက်ပါကဗျာက ၁၉၇၈ ခုနှစ်မှာ ရန်ဒန်ဟောက်စ် (Random House) စာအုပ်တိုက်က ထုတ်ဝေတဲ့ မာယာအိန်ဂျလိုရဲ့  တတိယမြောက် ကဗျာစာအုပ် (And Still I Rise) မှာ ပါဝင်တဲ့ ကဗျာတစ်ပုဒ်ဖြစ်ပါတယ်။

#ငါ…ရှင်သန်နေ တယ် (Still I Rise)
 
မာယာအိန်ဂျလို

မင်းရဲ့ ခါးသီးလှည့်ဖျားမှုတွေ၊ အလိမ်အညာတွေနဲ့
ငါ့သမိုင်းကို မကောင်းရေးဖွဲ့နိုင်တယ်၊
ညစ်ပတ်မှုတွေထဲမှာ ငါ့ကို နင်းခြေနိုင်တယ်၊
ဒါပေမည့်
၊ ဖုံမှုံ့ကလေးတစ်ခုလို ပဲ၊ ငါ…ရှင်သန်နေမယ်။

ငါ့ရဲ့  ရိုင်းပြမှုက မင်းကို ဒေါသဖြစ်စေသလား?
မင်းဟာ ဘာလို့များ မပီဝိုးတဝါးအတွေးများနဲ့ အနှောက်အယှက်ဖြစ်နေရတာလဲ?
ငါက ငါ့ရဲ့ ဧည့်ခန်းထဲ ရေနံတွင်းကြီးတွေရှိနေသလို
လမ်းလျှောက်နေတာကြောင့်လား? 

နေတွေ လတွေကြောင့်
လှိုင်းတွေရှိတာ သေချာသလိုမျိုး
မျှော်လင့်ချက်တွေ အမြင့်ကို ခုန်တက်သွားသလိုမျိုး
ငါ…ရှင်သန်နေမယ်။
ငါ… ကျိုးပဲ့ပျက်စီးသွားတာ မင်းမြင်ချင်သလား?
 
ခေါင်းကို ငုံ့လို့၊ မျက်လွှာချလို့?
ငါ့ရဲ့ ဝမ်းနည်းကြေကွဲ အော်မြည်ခြင်းတွေက လှိုက်စားလို့
ငါ့ပုခုန်းနှစ်ဖက်က မျက်ရည်စတွေလို လျောကျလို့?
ငါ့ရဲ့  မထီလေးစားနေတတ်မှုက မင်းကို စော်ကားရာရောက်သလား?
 
မင်း အလွန်အကျွံတွေးရာ ရောက်မနေဘူးလား?
ငါက ငါ့ရဲ့ ခြံနောက်ဖက်မှာ တူးဆွရင်း ရွှေတွင်းကြီးတွေ့သလို
ရီမောနေတာကြောင့်လား?။

မင်းရဲ့  စကားလုံးတွေနဲ့ ငါ့ကို ပစ်နိုင်ပါတယ်၊
မင်းရဲ့  မျက်လုံးတွေနဲ့ ငါ့ကို အပိုင်းပိုင်းဖြတ်နိုင်ပါတယ်၊
မင်းရဲ့  အမုန်းတွေအပြည့်နဲ့ ငါ့ကို သတ်နိုင်ပါတယ်၊
ဒါပေမည့်၊ လေလိုပဲ၊ ငါ…ရှင်သန်နေမယ်။

ငါ့ရဲ့  လိင်ဆွဲဆောင်မှုက မင်းကို ခါးသီးစေသလား?
ငါက ငါ့ပေါင်နှစ်ချောင်းဆုံရာအရပ်မှာ စိန်တစ်ပွင့်ရှိနေသလို ကနေတာကို
အံ့ဩစရာလို့ မင်းထင်နေတာလား?။

သမိုင်းရဲ့  အရှက်အကြောက်တွေနဲ့ တည်ဆောက်ထားတဲ့ တဲအိမ်ရဲ့အပြင်ဘက်မှာ
ငါ… ရှင်သန်တယ်၊
နာကျင်မှုတွေထဲမှာ အမြစ်တွယ်နေတဲ့ အတိတ်ကာလရဲ့  အထက်မှာ
ငါ… ရှင်သန်တယ်၊
ငါဟာ အကျယ်ပြန့်ဆုံး စီးဆင်းနေတဲ့ အနက်ရောင် သမုဒ္ဒရာဖြစ်တယ်၊
လှိုင်းတွေကို ပွေ့ပိုက်ရင်း နက်ရှိုင်းလိုက်၊ ယောင်ကိုင်းလိုက်နဲ့

အကြမ်းဖက်မှုနဲ့ အကြောက်တရားတွေအပြည့်နဲ့ ညတွေကို နောက်မှာချန်ထားပြီး
ငါ… ရှင်သန်တယ်၊
အံ့ဩစရာကောင်းလောက်အောင် ကြည်လင်ရှင်းသန့်တဲ့ နေ့သစ်တစ်ခုထဲ
ငါ… ရှင်သန်တယ်၊
ငါ့မျိုးနွယ်ရဲ့  ရှေ့ဦးအဘိုး၊ အဘွားတွေက ပေးခဲ့တဲ့ လက်ဆောင်တွေကို သယ်ဆောင်ရင်း
ငါဟာ ကျေးကျွန်များရဲ့  အိပ်မက်နဲ့ မျှော်လင့်ချက်အဖြစ်
ငါ… ရှင်သန်တယ်၊
ငါ… ရှင်သန်တယ်၊
ငါ… ရှင်သန်တယ်…၊။။။

အောက်ပါကဗျာက ၁၉၇၅ ခုနှစ်မှာ ရန်ဒန်ဟောက်စ်စာအုပ်တိုက်က ထုတ်ဝေတဲ့ “Oh Pray My Wings Are Gonna Fit Me Well” ကဗျာစာအုပ်မှာ ပါဝင်တဲ့ ကဗျာတစ်ပုဒ်ဖြစ်ပါတယ်။

#တစ်ယောက်ထဲ (Alone)
 
မာယာအိန်ဂျလို

မနေ့ညက
လဲလျောင်းလိုက်၊ တွေးလိုက်နဲ့
ငါ့စိတ်တွေကို တည်ငြိမ်အောင် ဘယ်မှာ နေရာချရမလဲ?
 
ရေကို ဆာလောင်စရာမလိုတဲ့ နေရာ
ပေါင်မုန့်လွှာတွေက ကျောက်တုံးမဟုတ်တဲ့ နေရာ
နောက်ဆုံးတော့ ငါတစ်ခုသိလိုက်တယ်
ငါ မမှားဘူးဆိုတာလည်း သေချာတယ်
ဘယ်သူမှ
တကယ်ပါ၊ ဘယ်သူမှ ဒီနေရာက တစ်ယောက်ထဲ လွတ်မြောက်နိုင်မှာမဟုတ်။
 တစ်ယောက်တည်း၊ တကယ့်ကို တစ်ယောက်ထဲ
ဘယ်သူမှ
တကယ်ပါ၊ ဘယ်သူမှ ဒီနေရာက တစ်ယောက်ထဲ လွတ်မြောက်နိုင်မှာမဟုတ်။

သုံးစွဲလို့ မကုန်နိုင်တဲ့ ပိုက်ဆံတွေနဲ့
သန်းကြွယ်သူဋ္ဌေးတွေ
သူတို့ရဲ့ ဇနီးတွေက နတ်သမီးလေးတွေလို ပြေးလွှားနေကြ
သူတို့ရဲ့  သားသမီးတွေက အပြာရောင်သီချင်းတွေ ဆိုကြ
သူတို့မှာ
သူတို့ရဲ့ ကျောက်တုံးနဲ့လုပ်တဲ့ နှလုံးသားတွေကို ကုသဖို့
ဈေးအကြီးဆုံး ဆရာဝန်တွေ ရှိတယ်
ဒါပေမည့်၊ ဘယ်သူမှ
မဟုတ်သေးဘူး၊ ဘယ်သူမှ
ဒီနေရာက တစ်ယောက်ထဲ လွတ်မြောက်နိုင်မှာမဟုတ်။

တစ်ယောက်တည်း၊ တကယ့်ကို တစ်ယောက်ထဲ
ဘယ်သူမှ
တကယ်ပါ၊ ဘယ်သူမှ ဒီနေရာက တစ်ယောက်ထဲ လွတ်မြောက်နိုင်မှာမဟုတ်။

ဒီမှာ
မင်းသာ ဂရုတစိုက်နားထောင်မယ်ဆိုရင်
ငါသိတာတွေ မင်းကိုပြောပြမယ်
မုန်တိုင်းကို ဖန်တီးမည့် တိမ်တွေ စုဝေးနေကြပြီ
မကြာခင်မှာ လေပြင်းတွေ တိုက်တော့မယ်
လူသားအားလုံး ခံစားနေကြရ
နာကျည်းအော်ညီးသံတွေ ငါကြားနေရ
ဘာကြောင့်ဆိုတော့ ဘယ်သူမှ
ဒါပေမည့် ဘယ်သူမှ
ဒီနေရာက တစ်ယောက်ထဲ လွတ်မြောက်နိုင်မှာမဟုတ်။

မာယာအိန်ဂျလို သေဆုံးခဲ့ပေမည့် သူ့ကဗျာတွေ၊ သူ့အနုပညာတွေကတော့ ရှင်သန်ဆဲဖြစ်ပါတယ်။ သူ့ကဗျာတွေကလည်း အမေရိကန်ပြည်ထောင်စုနယ်နမိတ်ကို ကျော်လွန်ပြီး ကမ္ဘာတဝှမ်းက အနုပညာမြတ်နိုးသူတွေကို လှောင်အိမ်ထဲက ငှက် ဘာကြောင့်တေးသီရသလဲဆိုတာကို နောက်နှစ်ပေါင်းများစွာ ဆက်လက်ပြောပြနေပါလိမ့်မယ်။

လေးစားစွာ

အောင်ဒင်
ဇွန်လ ၂၊ ၂၀၁၄

ပုံစာများ။
(၁) အမေရိကန်သမ္မတ အိုဘားမားက မာယာအိန်ဂျလိုအား သမ္မတ၏ လွတ်လပ်ရေးဆုတံဆိပ်ချီးမြှင့်နေစဉ်၊ ၂၀၁၀ ခုနှစ်
(၂)
အမေရိကန်သမ္မတ ဘီလ်ကလင်တန်၏ ကျမ်းသစ္စာကျိန်ဆိုပွဲ၌ မာယာအိန်ဂျလို ကဗျာရွတ်ဖတ်နေစဉ်၊ ၁၉၉၃ ခုနှစ်
(၃)
အမေရိကန်သမ္မတ အိုဘားမားက မာယာအိန်ဂျလိုအား သမ္မတ၏ လွတ်လပ်ရေးဆုတံဆိပ်ချီးမြှင့်နေစဉ်၊ ၂၀၁၀ ခုနှစ်
(၄) မာယာအိန်ဂျလို၏ “I Know Why the Caged Bird Sings” စာအုပ် မျက်နှာဖုံး၊

 


Burmese Society and Discrimination, Part (5)

(မဇ္ဇျိမနေ့စဉ်သတင်းစာ၊ ဇွန် ၁၈၊ ၂၀၁၄၊ ဗုဒ္ဓဟူးနေ့၊ စာမျက်နှာ ၁၇)

“မြန်မာ့လူ့အဖွဲ့အစည်းနှင့် ခွဲခြားဆက်ဆံခြင်းများ”၊ အပိုင်း (၅)

အောင်ဒင်

#ခွဲခြားဆက်ဆံခြင်း (၃) ခု ပေါင်းစုမိကြတဲ့အခါ

ရှေ့ပိုင်းမှာ အမျိုးသမီးများကို ခွဲခြားဆက်ဆံခြင်း၊ ဘာသာကွဲပြားမှုအရ ခွဲခြားဆက်ဆံခြင်း ၊ လူမျိုးကွဲပြားမှုအရ ခွဲခြားဆက်ဆံခြင်းများနဲ့ ၎င်းခွဲခြားဆက်ဆံခြင်းများရဲ့  တစ်ခုချင်းအလိုက် တိုင်းပြည်အပေါ် အန္တရာယ်ကြီးပုံများကို ဆွေးနွေးခဲ့ပါတယ်။ တစ်ခုချင်းစီတောင်မှ အန္တရာယ်ကြီးမားလှတဲ့ ခွဲခြားဆက်ဆံခြင်း (၃) မျိုးကို စုပေါင်းကျင့်သုံးတဲ့ အခါ ပို၍ပို၍ကြီးမားတဲ့ အန္တရာယ်ထုကြီး ဖြစ်လာပြီး တိုင်းပြည်ရဲ့  ပစ္စုပ္ပန်နဲ့ အနာဂတ်ကို ဖျက်ဆီးနိုင်စွမ်း ကြီးမားလာပါတယ်။ ဒီကနေ့ မြန်မာနိုင်ငံတဝှမ်းမှာ ဗုဒ္ဓဘာသာ ရဟန်းသံဃာအချို့ဦးဆောင်ပြီး ဗုဒ္ဓဘာသာဝင် လူသာမာန်တွေ အလုံးအရင်းနဲ့ ပါဝင်ထောက်ခံကြတဲ့ အမျိုး၊ ဘာသာ၊ သာသနာ စောင့်ရှောက်ကာကွယ်ရေးလှုပ်ရှားမှုကြီးဟာ လက်တွေ့မှာတော့ အမျိုးသမီးများကို ခွဲခြားဆက်ဆံတဲ့၊ ဘာသာခြားများကို ခွဲခြားဆက်ဆံတဲ့၊ လူမျိုးခြားများကို ခွဲခြားဆက်ဆံတဲ့ ဗုဒ္ဓဘာသာမပီသဆုံး လှုပ်ရှားမှုကြီး ဖြစ်နေပါတယ်။ မတူကွဲပြားတဲ့ ဘာသာတရားများ၊ မတူကွဲပြားတဲ့ လူမျိုးစုများ၊ မတူကွဲပြားတဲ့လူသားများ အပြန်အလှန်လေးစားလို့ မတူကွဲပြားမှုများကို စုစည်းညီညွတ်စေပြီး ငြိမ်းခြမ်းတည်ငြိမ်တိုးတက်တဲ့ နိုင်ငံတော်သစ် တည်ဆောက်ရမည့်အချိန်မှာ ဘာသာတစ်ခု၊ လူမျိုးတစ်စုထဲကို မြှင့်တင်ဖို့ ရည်ရွယ်လှုပ်ရှားကြတာဟာ စစ်အာဏာရှင်များကြောင့် ဆုံးရှုံးခဲ့ရတဲ့ လူ့အခွင့်အရေးများကို ပြန်လည်ရရှိဖို့၊ အမျိုးသားပြန်လည်သင့်မြတ်ရေးနဲ့ ပြည်တွင်းစစ်ချုပ်ငြိမ်းရေး၊ ဒီမိုကရေစီအရေးနဲ့ တိုင်းရင်းသားအားလုံး တန်းတူညီမျှရေးအတွက် စိုက်လိုက်မတ်တတ် ကြိုးစားနေ ကြတဲ့ မြန်မာ့ဒီမိုကရေစီလှုပ်ရှားသူများအတွက် ကြီးမားတဲ့ အဟန့်အတား၊ အနှောက်အယှက်ကြီးဖြစ်ပါတယ်။

အမျိုးဘာသာစောင့်ရှောက်သူများက ပြဋ္ဌန်းဖို့ တောင်းဆိုနေတဲ့ မျိုးစောင့်ဥပဒေ (၄) ရပ်မှာ "တစ်လင်တစ်မယားစနစ်ကျင့်သုံးရေးဥပဒေ" ကလွဲရင် ကျန်ဥပဒေ (၃) ခုဟာ လူ့အခွင့်အရေး၊ အမျိုးသမီးအခွင့်အရေးများကို အကြီးအကျယ်ခြိမ်းခြောက်ထိန်းချုပ်မည့် ဥပဒေများ ဖြစ်ကြပါတယ်။ "ကိုးကွယ်ရာ ဘာသာကူးပြောင်းခြင်းဆိုင်ရာဥပဒေ" ဟာဆိုရင် နိုင်ငံသားများရဲ့  လွတ်လပ်စွာကိုးကွယ်ခွင့်ကို ကန့်သတ်ထိန်းချုပ်မည့် ဥပဒေဖြစ်ပါတယ်။ ဗုဒ္ဓဘာသာ ရဟန်းသံဃာများနဲ့ ဗုဒ္ဓဘာသာဝင်များက တောင်းဆိုတာကို ဗုဒ္ဓဘာသာဝင်များ အများစုဖြစ်တဲ့ အစိုးရက ရေးဆွဲတာမို့ အခြားကိုးကွယ်ရာ ဘာသာများ၊ အခြားဘာသာကိုးကွယ်သူများ ၊ တိုင်းရင်းသားများကို တရားဝင် ခွဲခြားဆက်ဆံမည့် ဥပဒေဖြစ်ပါတယ်။ "လူဦးရေတိုးပွါးမှုနှုန်း ထိန်းညှိခြင်းဆိုင်ရာ ဥပဒေ" ဆိုရင်လည်း မိသားစုတစ်စုမှာ ကလေးဘယ်နှစ်ယောက်ယူမယ်ဆိုတဲ့ မိသားစုတစ်စုရဲ့  ကိုယ်ပိုင်ဆုံးဖြတ်ခွင့်ကို အစိုးရအာဏာနဲ့ ထိန်းချုပ်ကန့်သတ်တာဖြစ်ပါတယ်။ "လက်ထပ်ထိန်းမြားခြင်းဆိုင်ရာ ဥပဒေ" ဟာလည်း အမျိုးသမီးများရဲ့  လွတ်လပ်ခွင့်ကို ထိန်းချုပ်ပြီး အမျိုးသမီးများကို ခွဲခြားဆက်ဆံတာ ဖြစ်ပါတယ်။ ကျနော် မကန့်ကွက်တဲ့ "တစ်လင်တစ်မယားစနစ်ကျင့်သုံးရေးဥပဒေ" တောင်မှ လူ့ဘောင်နဲ့ ဝေးအောင်နေရမည့်၊ လူတွေရဲ့  အနေအထိုင်အပြုအမူတွေကို ရှောင်ကြဉ်ရမည့် ဗုဒ္ဓဘာသာ ရဟန်းသံဃာတွေက တောင်းဆိုတာ၊ ဖိအားပေးတာ မဖြစ်သင့်ပဲ ပြည်သူများက လွှတ်တော်ကိုယ်စားလှယ်များကို အကြံပြုတာမျိုးပဲ ဖြစ်သင့်ပါတယ်။

#ကမ္ဘာတဝှမ်းတွင် ခွဲခြားဆက်ဆံခြင်းများကို ဆန့်ကျင်ခြင်း

ခွဲခြားဆက်ဆံခြင်းများဟာ တိုင်းပြည်နဲ့ နိုင်ငံသားများအပေါ် ကြီးမားတဲ့ ဆိုးကျိုးသက်ရောက်မှုတွေ ဖြစ်ပေါ်စေတာမို့ ကမ္ဘာ့နိုင်ငံအတော်များများမှာ ခွဲခြားဆက်ဆံခြင်းများကို တိုက်ဖျက်ဖို့၊ တားမြစ်ပိတ်ပင်ဖို့ ဥပဒေများ ပြဋ္ဌန်းကြပါတယ်။ ဥပမာအချို့ကို တင်ပြပါမယ်။
အမေရိကန်ပြည်ထောင်စု ဖွဲ့စည်းပုံအခြေခံဥပဒေကို ၁၇၈၇ ခုနှစ်မှာ ပြဋ္ဌန်းအတည်ပြုခဲ့ပြီး (၄) နှစ်အကြာ ၁၇၉၁ ခုနှစ်မှာ "နိုင်ငံသားများ၏ မွေးရာပါ ရပိုင်ခွင့်များ" (Bill of Rights) လို့ ကြော်ကြားတဲ့ ပြင်ဆင်ချက် (၁၀) ခုကို ပြဋ္ဌန်းအတည်ပြုခဲ့ပါတယ်။ ပထမဆုံးပြင်ဆင်ချက် (First Amendment) သို့မဟုတ် ပထမဆုံးသတ်မှတ်တဲ့ အခွင့်အရေးများက "လွတ်လပ်စွာကိုးကွယ်ယုံကြည်ခွင့်၊ လွတ်လပ်စွာရေးသားခွင့်၊ လွတ်လပ်စွာဟောပြောခွင့်၊ လွတ်လပ်စွာစုဝေးခွင့်၊ လွတ်လပ်စွာ အစိုးရထံ နစ်နာမှုများဖြေရှင်းပေးရန်တောင်းဆိုခွင့်များ" ဖြစ်ကြပါတယ်။ အဲဒီ ပထမပြင်ဆင်ချက်က ကွန်ဂရက်လွှတ်တော်က အဆိုပါ အခြေခံအခွင့်အရေးများကို ကန့်သတ်ချုပ်ချယ်မည့် ဘယ်လိုဥပဒေကိုမှ မပြဋ္ဌန်းရလို့ ပိတ်ပင်ထားပါတယ်။ ၁၉၆၄ ခုနှစ်၊ ဇူလိုင်လ ၂၈ ရက်နေ့မှာ အတည်ပြုတဲ့ "နိုင်ငံသားအခွင့်အရေးများဥပဒေ" (Civil Rights Act of 1964) က အသားအရောင်၊ လူမျိုး၊ ကိုးကွယ်ရာဘာသာ၊ ကျားမလိင်ကွဲပြားမှု၊ ဇာတိ စတာတွေပေါ်အခြေခံပြီး ခွဲခြားဆက်ဆံမှုများအားလုံးကို ရာဇဝတ်မှုမြောက်တယ်လို့ သတ်မှတ်ပါတယ်။ ၁၉၆၃ ခုနှစ်မှာ ပြဋ္ဌန်းတဲ့ "တူညီသော လစာပေးခြင်းဥပဒေ" (Equal Pay Act of 1963) က မိန်းမ၊ ယောင်္ကျားခွဲခြားပြီး မိန်းမများကို ယောင်္ကျားများထက် လစာနဲ့ အခွင့်အရေးလျှော့ပေးတာကို တားမြစ်ပါတယ်။

ဩစတြေးလျ (Australia) နိုင်ငံမှာ ၁၉၇၅ ခုနှစ်မှာ "လူမျိုးရေးဆိုင်ရာ ခွဲခြားဆက်ဆံခြင်းဥပဒေ" (Racial Discrimination Act 1975) ကို ပြဋ္ဌန်းခဲ့ပါတယ်။ ဒီဥပဒေအရ မည်သူ့ကိုမဆို အသားရောင်၊ လူမျိုး၊ ကျားမလိင်ကွဲပြားမှု၊ ကိုးကွယ်ရာဘာသာ၊ မူလဇာတိဒေသ စတာတွေပေါ် အခြေခံပြီး အလုပ်အကိုင်ခန့်အပ်ရာမှာ၊ လစာပေးရာမှာ၊ အိမ်ယာအဆောက်အအုံငှါးရမ်းရာမှာ သို့မဟုတ် ဝယ်ယူရာမှာ သို့မဟုတ် နေရာချပေးရာမှာ၊ အများပြည်သူနှင့် သက်ဆိုင်သော နေရာများသို့ ဝင်ရောက်ရာမှာ၊ အသင်းအဖွဲ့အစည်းများမှာ ပါဝင်ရာမှာ၊ ဘဏ်မှငွေချေးရာမှာ၊ အစိုးရ၏ အထောက်အပံ့တောင်းခံရာမှာ၊ ကျန်းမာရေးစောင့်ရှောက်မှု ခံယူရာမှာ၊ ခွဲခြားဆက်ဆံမှုများ မပြုလုပ်ရလို့ အတိအလင်းတားမြစ်ပြီး တားမြစ်ချက်ကို ချိုးဖောက်ရင် ရာဇဝတ်မှုမြောက်ပါတယ်။ ဒါတင်မကသေးပဲ လူတစ်ယောက်ကို အခြားတစ်ယောက်က အသားရောင်၊ လူမျိုး၊ ကျားမလိင်ကွဲပြားမှု၊ ကိုးကွယ်ရာဘာသာ၊ မူလဇာတိဒေသ စတာတွေပေါ် အခြေခံပြီး ချိုးချိုးနှိမ်နှိမ် ခေါ်ဝေါ်ဆက်ဆံရင်လည်း ရာဇဝတ်မှုဖြစ်ပါတယ်။
ဥရောပသမဂ္ဂ (European Union) က ၂၀၀၀ ခုနှစ်မှာ အဖွဲ့ဝင်နိုင်ငံများအားလုံး လိုက်နာရမည့် "လူမျိုးစုဆိုင်ရာ တန်းတူညီမျှမှု ညွှန်ကြားချက်" (Racial Equality Directive-2000/43/EC) ကို ထုတ်ပြန်ထားပါတယ်။ ဒီညွှန်ကြားချက်အရ ဥရောပသမဂ္ဂနိုင်ငံများအားလုံးဟာ လူအားလုံးကို လူမျိုး၊ ဘာသာ မခွဲခြားပဲ တန်းတူညီမျှ ဆက်ဆံရမှာဖြစ်ပါတယ်။ အလားတူ ကျား၊မလိင်ကွဲပြားမှု၊ အသက်အရွယ်၊ မသန်မစွမ်းဖြစ်မှုတွေကို အခြေခံပြီး ခွဲခြားဆက်ဆံတာကို တားမြစ်တဲ့ ဥပဒေတွေကိုလည်း ဥရောပသမဂ္ဂက ထုတ်ပြန်ထားပါတယ်။

၁၉၇၉ ခုနှစ်မှာ ကုလသမဂ္ဂအထွေထွေညီလာခံက "အမျိုးသမီးများ ခွဲခြားဆက်ဆံမှု ပုံစံအားလုံးပပျောက်ရေး နိုင်ငံတကာသဘောတူစာချုပ်" (Convention on the Elimination of All Forms of Discrimination against Women) (CEDAW) ကို အတည်ပြုခဲ့ပြီး အဲဒီ စာချုပ်ကို နိုင်ငံပေါင်း (၁၈၈) နိုင်ငံပေါင်း လက်မှတ်ရေးထိုးပြီးတဲ့နောက် ၁၉၈၁ ခုနှစ်၊ စက်တင်ဘာလ ၃ ရက်နေ့မှာ အသက်ဝင်တည်ရှိလာပါတယ်။ ဒီသဘောတူညီမှုအရ အဖွဲ့ဝင်နိုင်ငံတိုင်းဟာ အမျိုးသမီးများအပေါ် ခွဲခြားဆက်ဆံမှုများအားလုံးကို ပပျောက်အောင် ဆောင်ရွက်ရမှာဖြစ်ပါတယ်။ ပုံစံအားလုံးလို့ ဆိုတဲ့အတိုင်း အလုပ်ခန့်ရာမှာ၊ လစာနဲ့ အခွင့်အရေးပေးရာမှာ၊ နိုင်ငံရေးတာဝန်ယူရာမှာ၊ စသဖြင့် နေရာတိုင်းမှာ အမျိုးသမီးများကို ခွဲခြားဆက်ဆံမှုတွေ မရှိရပဲ ယောင်္ကျား၊ မိန်းမ တန်းတူညီမျှမှုကို အားပေးရမှာဖြစ်ပါတယ်။ မြန်မာနိုင်ငံက ဒီစာချုပ်ကို ၁၉၉၇ ခုနှစ်မှာ လက်မှတ်ရေးထိုးခဲ့ပါတယ်။ 

ကမ္ဘာ့ကုလသမဂ္ဂအဖွဲ့ကြီးက ၁၉၆၅ ခုနှစ်၊ ဒီဇင်ဘာလ ၂၁ ရက်နေ့မှာ "လူမျိုးရေးဆိုင်ရာ အားလုံးသော ခွဲခြားဆက်ဆံမှုများ ပပျောက်ရေး နိုင်ငံတကာသဘောတူစာချုပ်" (International Convention on the Elimination of All Forms of Racial Discrimination)  (ICERD) ကို အတည်ပြုခဲ့ပြီး ၁၉၆၉ ခုနှစ်၊ ဇန်နဝါရီလ ၄ ရက်နေ့မှာ အဖွဲ့ဝင် (၈၇) နိုင်ငံနဲ့ အဖွဲ့အစည်း (၁၇၇) ဖွဲ့က ထောက်ခံလက်မှတ်ရေးထိုးပြီး အသက်ဝင်တည်ရှိခဲ့ပါတယ်။ ဒီနိုင်ငံတကာစာချုပ်အရ အဖွဲ့ဝင်နိုင်ငံများအားလုံးဟာ သက်ဆိုင်ရာနိုင်ငံများအတွင်းမှာ အသားအရောင်ခွဲခြားမှုများ၊ လူမျိုးရေးရာ ခွဲခြားဆက်ဆံမှုများ ပပျောက်အောင် ဆောင်ရွက်ရမှာဖြစ်ပြီး မတူကွဲပြားတဲ့ လူမျိုးစုများအကြား အပြန်အလှန်နားလည်မှုများကို အားပေးတည်ဆောက်ရမှာဖြစ်ပါတယ်။ အဖွဲ့ဝင်နိုင်ငံများဟာ အမုန်းတရားပြန့်ပွါးရေးလှုံ့ဆော်မှုများကို ထိထိရောက်ရောက် တားမြစ်ပိတ်ပင်ရမှာဖြစ်ပြီး လူမျိုးရေးအစွန်းရောက်အဖွဲ့အစည်းများကိုလည်း ရာဇဝတ်ဥပဒေနဲ့ အရေးယူရမှာဖြစ်ပါတယ်။ ဒီစာချုပ်အတိုင်း နိုင်ငံများရဲ့  ဆောင်ရွက်မှုတွေကို "လူမျိုးရေုးဆိုင်ရာ အားလုံးသော ခွဲခြားဆက်ဆံမှုများ ပပျောက်ရေးကော်မီတီ" (Committee on the Elimination of Racial Discrimination) (CERD) က ကြီးကြပ်ပါတယ်။ မြန်မာနိုင်ငံက ဒီစာချုပ်ကို အခုထိ လက်မှတ်မထိုးသေးပါ။

#မြန်မာနိုင်ငံမှ ခွဲခြားဆက်ဆံမှုများကို အဆုံးသတ်ခြင်း

ခွဲခြားဆက်ဆံခြင်းတွေက မြန်မာ့လူ့အဖွဲ့အစည်းအတွင်းမှာ နက်နက်ရှိုင်းရှိုင်းခိုင်ခိုင်မာမာ တည်ရှိနေတာမို့ ပပျောက်အောင် ဆောင်ရွက်ဖို့ဆိုတာ အင်မတန်ခက်ခဲလှတဲ့ တာဝန်ကြီးတစ်ခုဖြစ်ပါတယ်။ ပြီးတော့ အင်မတန်ရန်လိုတဲ့ ဘာသာရေး၊ လူမျိုးရေးအစွန်းရောက်သူများနဲ့ ရင်ဆိုင်ရမှာမို့ အင်မတန်အန္တရာယ်များတဲ့ အလုပ်လည်းဖြစ်ပါတယ်။ ဒါပေမည့် ဒီခွဲခြားဆက်ဆံမှုတွေကို အချိန်မီမဟန့်တားနိုင်ရင် ပဋိပက္ခတွေမြင့်မား၊ အကြမ်းဖက်မှုတွေအားကောင်းပြီး ကျနော်တို့နိုင်ငံ ဘယ်လိုမှ ငြိမ်းချမ်းမှာမဟုတ်ပါ။ ပြည်တွင်းစစ်ကို ရပ်စဲနိုင်မှာ မဟုတ်တဲ့အပြင် လူမျိုးရေး၊ ဘာသာရေးပဋိပက္ခများ ထပ်မံပေါင်းစပ်လို့ တိုင်းပြည် ပြိုကွဲကျဆုံးနိုင်ပါတယ်။ ဒါကြောင့် ကျနော်တို့ရဲ့ နောက်မျိုးဆက်များ ငြိမ်းချမ်းတည်ငြိမ်နိုင်ဖို့ ကျနော်တို့ စွန့်စားကြရမှာပါ။ 

ခွဲခြားဆက်ဆံမှုများကို အဆုံးသတ်နိုင်ဖို့ရာ တိုင်းပြည်အာဏာရအဖွဲ့အစည်းများ၊ နိုင်ငံရေးအင်အားစုများ၊ ဘာသာရေးအဖွဲ့အစည်းများ၊ အရပ်ဘက်အဖွဲ့အစည်းများအားလုံးမှာ တာဝန်ရှိပါတယ်။
အစိုးရဆိုတာ တရားဥပဒေစိုးမိုးရေးအတွက် အဓိကတာဝန်ရှိသူပါ။ အစိုးရအာဏာနဲ့ လူများစုက လူနည်းစုကို အနိုင်ကျင့်တိုက်ခိုက်တာတွေ၊ ဘာသာရေးအလံထောင်ပြီး အကြမ်းဖက်တာတွေ၊ အမုန်းတရားဖြန့်ချီတာတွေ၊ အမုန်းတရားရဲ့  လှုံ့ဆော်မှုကြောင့် ကျူးလွန်တဲ့ ရာဇဝတ်မှုတွေကို ထိထိရောက်ရောက် အရေးယူရမှာပါ။ လူနည်းစုကို အကာအကွယ်ပေး စောင့်ရှောက်ရမှာပါ။ လူများစုကိုးကွယ်ရာ ဘာသာကို အလွန်အကျွံဦးစားပေးတာ မလုပ်သင့်ပါ။ 

ဖွဲ့စည်းပုံအခြေခံဥပဒေပါ နိုင်ငံသားများရဲ့ အခွင့်အရေးနဲ့ ဆန့်ကျင်ဘက်ဖြစ်တဲ့ ဥပဒေကြမ်းများ ရေးဆွဲဖို့ တောင်းဆိုတာမျိုးကို မလိုက်လျောသင့်ပါ။ ကမ္ဘာ့ကုလသမဂ္ဂအဖွဲ့ကြီးရဲ့ "လူမျိုးစုဆိုင်ရာ အားလုံးသော ခွဲခြားဆက်ဆံမှုများ ပပျောက်ရေး နိုင်ငံတကာသဘောတူစာချုပ်" ကို အမြန်ဆုံး လက်မှတ်ရေးထိုးသင့်ပါတယ်။ မြန်မာနိုင်ငံဟာ ဘာသာပေါင်းစုံ၊ လူမျိုးပေါင်းစုံ စုဝေးနေထိုင်ရာ နိုင်ငံဖြစ်တယ်ဆိုတဲ့ အသိတရားကို ပြည်သူများကြား လှုံ့ဆော်ပညာပေးပြီး မတူကွဲပြားအင်အားစုများ ငြိမ်းချမ်းစွာ အတူတကွယှဉ်တွဲနေထိုင်ရေးသဘောတရားကို အားပေးသင့်ပါတယ်။ အခြေခံပညာရေးစနစ်ရဲ့  သင်ရိုးညွှန်းတမ်းမှာ မတူကွဲပြားအင်အားစုများ ငြိမ်းချမ်းစွာ အတူတကွယှဉ်တွဲနေထိုင်ရေးပညာပေးမှုများ ထည့်သွင်းသင်ကြားစေသင့်ပါတယ်။ 
လွှတ်တော်အနေနဲ့ မတရားတဲ့ ဥပဒေများကို မပြဋ္ဌန်းဖို့နဲ့ တရားတဲ့ ဥပဒေများကို ပြဋ္ဌန်းဖို့ အထူးတာဝန်ရှိပါတယ်။ ခွဲခြားဆက်ဆံမှုများကို တားမြစ်တဲ့ ဥပဒေတွေ ရေးဆွဲပြဋ္ဌန်းသင့်ပါတယ်။ 

တိုင်းရင်းသားလူမျိုးစုများရဲ့  တန်းတူညီမျှမှုကို အာမခံဖို့နဲ့ ကိုယ်ပိုင်အုပ်ချုပ်ခွင့်တွေပေးဖို့ ဖွဲ့စည်းပုံအခြေခံဥပဒေကို ပြင်ဆင်ရေးဆွဲသင့်ပါတယ်။ ပြည်ထောင်စုလွှတ်တော်နာယက သူရဦးရွှေမန်း ၂၀၁၃ ခုနှစ်အတွင်း အမေရိကန်ပြည်ထောင်စုကို အလည်လာတုန်းက "အမုန်းတရား ဖြန့်ချီဟောပြောစည်းရုံးမှုများကို တားမြစ်ဖို့" ဥပဒေတွေ ပြဋ္ဌန်းမယ်လို့ ပြောသွားခဲ့ပါတယ်။ ဒီကနေ့အထိတော့ အမုန်းတရားဟောပြောမှုများကို ဥပဒေပြု တားဆီးတာ မတွေ့ရသေးပါ။ အမုန်းတရားဟောပြောမှုကို တားဆီးအရေးယူတဲ့ ဥပဒေမရှိသေးပေမည့်၊ ခွဲခြားဆက်ဆံမှုများကို ဟန့်တား၊ တားမြစ်တဲ့ ဥပဒေတွေ မရှိသေးပေမည့် ခွဲခြားဆက်ဆံမှုတွေကို တရားဝင်ဖြစ်စေမည့် ဥပဒေတွေ ပြဋ္ဌန်းဖို့ တောင်းဆိုတာကိုတော့ အလွယ်တကူ သဘောတူလိုက်တာကို ဝမ်းနည်းဖွယ်တွေ့မြင်ရပါတယ်။

နိုင်ငံရေးပါတီများ၊ နိုင်ငံရေးသမားများအတွက် အရေးကြီးဆုံးက ဘာသာရေးနဲ့ နိုင်ငံရေးကို မရောထွေးဖို့ ဖြစ်ပါတယ်။ ၎င်းတို့ရဲ့  နိုင်ငံရေးလှုပ်ရှားမှုများမှာ ဘာသာရေးကို ခုတုံးမလုပ်ဖို့ ဖြစ်ပါတယ်။ ၎င်းတို့ရဲ့  ရွေးကောက်ပွဲမှာ မဲအနိုင်ရရေးအတွက် ဘာသာရေး၊ လူမျိုးရေးအစွန်းရောက်များရဲ့ အသုံးချမှုကို မခံဖို့ အထူးလိုအပ်ပါတယ်။

ကျနော်တို့တိုင်းပြည်မှာ "နိုင်ငံတော်သံဃာ့မဟာနာယကအဖွဲ့" (မဟန) အပေါ် ပြည်သူများနဲ့ သံဃာများက အစိုးရခန့်အဖွဲ့အစည်းတစ်ခုအဖြစ်ပဲ မြင်ကြပါတယ်။ ဒါကြောင့် မဟန ရဲ့ ဩဇာဟာ သံဃာထုအပေါ် သက်ရောက်မှု သိပ်မရှိလှပါ။ သံဃာထုအပေါ် ဩဇာသက်ရောက်မှုရှိတာက သံဃာ့ဂိုဏ်းအသီးသီးရဲ့ အကြီးအကဲများ ဖြစ်ကြပါတယ်။ မြန်မာနိုင်ငံမှာ ၁၉၈၀ ခုနှစ်ကစလို့ သုဓမ္မာ၊ ရွှေကျင်၊ ငှက်တွင်း စသဖြင့် သံဃာ့ဂိုဏ်းကြီး ကိုးဂိုဏ်းပဲ ရှိပါတယ်။ အဲဒီ ဂိုဏ်းအသီးသီးမှာ သာသနာပိုင်တွေ၊ ဂိုဏ်းချုပ်ဆရာတော်တွေ၊ မဟာနာယကဆရာတော်တွေရှိကြပါတယ်။ အဲဒီ ဂိုဏ်းအလိုက် သံဃာအကြီးအကဲများကို သမ္မတကိုယ်တိုင်ကဖြစ်စေ၊ သမ္မတရဲ့ လက်ထောက်များကဖြစ်စေ ချဉ်းကပ်ပြီး သက်ဆိုင်ရာ ဂိုဏ်းအလိုက် ဂိုဏ်းဝင်သံဃာများကို စည်းကမ်းထိန်းသိမ်းကြဖို့ လျှောက်ထားသင့်ပါတယ်။ အမုန်းတရားကို ဟောပြောနေတဲ့ သံဃာအချို့ရဲ့ ဟောပြောချက်တွေနဲ့ပါတ်သက်ပြီး သက်သေအထောက်အထားတွေရှိပါတယ်။ သူတို့ဟောတဲ့ စီဒီခွေတွေ၊ ဗီဒီယိုတွေ၊ စာရွက်စာတမ်းတွေ၊ အဲဒီအထောက်အထားတွေကို ဂိုဏ်းချုပ်ဆရာတော်ကြီးများကို ပြပြီး သက်ဆိုင်ရာဂိုဏ်းအလိုက် စည်းကမ်းများနဲ့ အရေးယူဖို့ လျှောက်ထားသင့်ပါတယ်။ အဲဒီလို လျှောက်ထားတာကို ပြည်သူတွေသိအောင် ထုတ်ပြန်ကြေညာသင့်ပါတယ်၊

တစ်ချိန်တည်းမှာပဲ အစ္စလမ်ဘာသာရေးအဖွဲ့အစည်းခေါင်းဆောင်များကလည်း သူတို့ရဲ့ ဘာသာဝင်များအနေနဲ့ ဗုဒ္ဓဘာသာကို စော်ကားတဲ့ အပြုအမူ၊ အပြောအဆိုတွေ မလုပ်ကြဖို့ တိုက်တွန်းစေသင့်ပါတယ်။ ၂၀၁၃ ခုနှစ်၊ အောက်တိုဘာလထဲမှာ သံတွဲမြို့၊ သဗြုချိုင်ရွာမှာဖြစ်ခဲ့တဲ့ ပဋ္ဋိပက္ခမှာ အစ္စလမ်ဘာသာဝင် ကမန်လူမျိုးတစ်ယောက်က ဗုဒ္ဓဘာသာဝင်တစ်ယောက်ကို ဆဲဆိုကြိမ်းမောင်းရာကစတင်တယ်လို့ သိရပါတယ်။ အစ္စလမ်ဘာသာရေးအဖွဲ့အစည်း ခေါင်းဆောင်များကိုယ်တိုင်မှာလည်း သူတို့ဘာသာဝင်တွေကို ဒေါသကို ဒေါသနဲ့ မတုန့်ပြန်အောင်ထိန်းသိမ်းဖို့၊ သူတို့ကိုယ်တိုင်က ပဋ္ဋိပက္ခကို မစမိအောင်ထိန်းသိမ်းဖို့ တာဝန်ရှိပါတယ်။ အထူးသဖြင့် ဗလီတွေထဲမှာ လက်နက်တွေ စုဆောင်းသိုလှောင်တာမျိုးတွေမလုပ်ကြဖို့၊ အကြမ်းမဘက်ကြဖို့ ၊ အစ္စလမ်ဘာသာရေးကျောင်းတွေမှာ ရခိုင်မုန်းတီးရေး၊ ဗုဒ္ဓဘာသာမုန်းတီးရေးတွေ မသင်ကြားကြဖို့၊ မွတ်ဆလင်အစွန်းရောက်များနဲ့ မဆက်သွယ်ကြအောင်ထိန်းသိမ်းဖို့ တာဝန်ရှိပါတယ်။

အစိုးရ၊ လွှတ်တော်နဲ့ နိုင်ငံရေးပါတီများ ကိုယ်တိုင်က ခွဲခြားဆက်ဆံမှုများ အဆုံးသတ်ရေး အားနည်းလှတဲ့အပြင် အမျိုး၊ ဘာသာ၊ သာသနာလှိုင်းကို မကျော်လွှားရဲသလို တွေ့နေရတော့ ခွဲခြားဆက်ဆံမှုများအဆုံးသတ်ရေး ကြိုးစားနေတဲ့ အရပ်ဘက်အဖွဲ့အစည်းများအတွက် အင်မတန် မြင့်မားမတ်စောက်တဲ့ တောင်ကြီးကို လုံလောက်တဲ့ အောက်စီဂျင်မရှိပဲ တက်နေရသလို ဖြစ်နေပါလိမ့်မယ်။ အားမလျှော့ကြစေချင်ပါ။ မြန်မာနိုင်ငံဟာ တစ်ချိန်ကလို တံခါးပိတ်ထားတဲ့ တိုင်းပြည်မဟုတ်တော့ပါ။ မြန်မာနိုင်ငံရဲ့  အပြောင်းအလဲတွေကို စိတ်ဝင်တစား စောင့်ကြည့်နေတဲ့ ကမ္ဘာ့နိုင်ငံများ၊ ကမ္ဘာ့အဖွဲ့အစည်းများက ဒီမိုကရေစီနဲ့ ငြိမ်းချမ်းရေးအတွက် ရှေ့တိုးရွေ့လျားတဲ့ ခြေလှမ်းများကိုသာ အားပေးကူညီကြမှာဖြစ်ပြီး အမှောင်ခေတ်ကြီး နောက်ပြန်သွားမည့် ဘယ်လိုလှုပ်ရှားမှုမျိုးကိုမဆို ဝိုင်းဝန်းကန့်ကွက်ကြမှာပါ။ ပြီးတော့ မြန်မာနိုင်ငံ လူဦးရေရဲ့  ၅၀ ရာခိုင်နှုန်းကျော်က အမျိုးသမီးနဲ့ မိန်းကလေးတွေပါ၊ လူဦးရေရဲ့  တစ်ဝက်ကျော်လောက်က အသက် ၁၄ နှစ်နဲ့ အသက် ၅၀ ကြား ခေတ်မီတိုးတက်မှုကို မြတ်နိုးကြတဲ့၊ ငြိမ်းချမ်းတည်ငြိမ်မှုကို လိုလားတဲ့ လူငယ်၊ လူရွယ်တွေပါ။ ဒီအင်အားစုကြီးဟာ ခွဲခြားဆက်ဆံမှုများကို လက်မခံမည့်၊ အမှောင်ခေတ်ကြီးထဲ ပြန်သွားမည့် ဘယ်လိုလှုပ်ရှားမှုမျိုးကိုမဆို လက်မခံမည့် ပြည်သူတွေပါ။ ခွဲခြားဆက်ဆံမှုကို ဆန့်ကျင်တဲ့ အရပ်ဘက်အဖွဲ့အစည်းများအဖို့ အဲဒီ အမျိုးသမီးနဲ့ လူငယ်အင်အားစုကြီးကို ပညာပေးစည်းရုံးပြီး မြန်မာနိုင်ငံကို ဘာသာပေါင်းစုံ၊ လူမျိုးပေါင်းစုံ ငြိမ်းချမ်းစွာစုဝေးနေထိုင်ကြတဲ့ နိုင်ငံဖြစ်အောင် တည်ဆောက်ကြရမှာပါ။

မြန်မာနိုင်ငံမှာ၊ မြန်မာ့လူ့အဖွဲ့အစည်းအတွင်းမှာ ခွဲခြားဆက်ဆံမှုများအားလုံး ကျဆုံးပါစေ။

လေးစားစွာ၊

အောင်ဒင်
မေ ၂၈၊ ၂၀၁၄