လှပခြင်းနှင့် ညစ်ပတ်ခြင်း

(7 Day Daily နေ့စဉ်သတင်းစာ၊ စက်တင်ဘာလ ၁၉ ရက်၊ ၂၀၁၅)

လှပခြင်းနှင့် ညစ်ပတ်ခြင်း

အောင်ဒင်

#ပုဂံယဉ်ကျေးမှုနယ်မြေ၊ ညောင်ဦး

၂၀၁၄ ခုနှစ်၊ နိုဝင်ဘာလထဲမှာ မိသားစု၊ သူငယ်ချင်းများနဲ့ အတူ ပုဂံကို ရောက်ခဲ့ပါတယ်။ မြန်မာလူမျိုးမှန်ရင် ပုဂံကို အကြိမ်ကြိမ်ရောက်ဖူးရမယ်လို့ ဆိုစကားရှိပေမယ့် ကျနော့်အဖို့တော့ အသက် ၅၀ ကျော်မှပဲ ပုဂံကို ပထမဆုံးအကြိမ်ရောက်ဖူးတာပါ။ ပုဂံရဲ့ တည်ငြိမ်မှု၊ ခန့်ငြားမှု၊ ထည်ဝါမှု၊ ယဉ်ကျေးမှုတွေကို ပထမဆုံးအကြိမ် ကိုယ်တိုင်ကိုယ်ကျ တွေ့မြင်ခံစားရပြီး တစ်ချိန်က တောက်ပခိုင်မာခဲ့တဲ့ အနော်ရထာမင်းလက်ထက် ပုဂံနိုင်ငံတော်ကြီးကို လွမ်းဆွတ်တမ်းတမိပါတယ်။ ၃၄ ဆက်မြောက် ပုဂံမင်းဆက်ဖြစ်တဲ့ ပျဉ်ပြားမင်းက ခရစ်သက္ကရာဇ် ၈၄၉ ခုနှစ်မှာ တည်ထောင်ခဲ့တယ်ဆိုတဲ့ စတုတ္ထမြောက် ပုဂံ၊ မြန်မာ့ယဉ်ကျေးမှုရဲ့ အစ၊ မြန်မာ့စာပေရဲ့ အစလို့ ပြောကြတဲ့ ပုဂံဟာ နှစ်ပေါင်း တစ်ထောင်ကျော်ကြာမြင့်ခဲ့ပြီးတဲ့နောက် ၂၁ ရာစုနှစ်ထဲမှာတောင်မှ လက်ကျန် ဘုရားစေတီများနဲ့ တည်ငြိမ်ခန့်ငြားနေဆဲ ဖြစ်ပါတယ်။ မြေပြန့်လွင်ပြင်ကျယ်ကြီးထဲမှာ များပြားလှစွာသော ဂူဘုရားများ၊ စေတီများက ရှေးမြန်မာတို့ရဲ့ အဆင့်အတန်းမြင့်မားလှတဲ့ ပိသုကာပညာအစွမ်းကို သက်သေပြနေပါတယ်။ ညနေစောင်းမှာ ဧရာဝတီမြစ်ကမ်းနဘေး ဗူးဘုရားရင်ပြင်ပေါ်ကနေ နေဝင်ချိန်၊ နေလုံးကြီး ဧရာဝတီမြစ်ထဲ တဖြေးဖြေး ငုတ်ဆင်းပျောက်ကွယ်သွားတာကို ငြိမ်ငြိမ်သက်သက်စောင့်ကြည့်ရတာ အင်မတန်လွမ်းမောစရာ ကောင်းလှပါတယ်။

နိုင်ငံခြားသား ကမ္ဘာလှည့်ခရီးသည်တွေက ပုဂံဘုရားများရဲ့ ပိသုကာလက်ရာတွေ၊ နံရံဆေးရေးပန်းချီတွေ၊ ကျယ်ပြန့်ခိုင်မာလှတဲ့ လှိုဏ်ဂူကြီးတွေကို တအံ့တဩ ကြည်နူးနေကြတာ၊ ဒေသထွက် လက်မှုအနုပညာပစ္စည်းများနဲ့ နေဝင်ချိန်အလှအပတွေကို ရင်သပ်ရှုမောခံစားနေကြတာကို ကြည့်ပြီး မြန်မာလူမျိုးတစ်ယောက် ဖြစ်ရတာကို ဂုဏ်ယူမိပါသေးတယ်။ ဒါပေမယ့်လည်း ပုဂံရဲ့ လှပမှု၊ ယဉ်ကျေးတည်ငြိမ်မှုတွေနဲ့ ယှဉ်တွဲတည်ရှိနေတဲ့ အမှိုက်သရိုက်တွေ၊ ညစ်ညမ်းမှုတွေကို တွေ့ရပြန်တော့ အံ့ဩဝမ်းနည်းရပြန်ပါတယ်။

ပုဂံမြို့ကို ကားနဲ့ ဝင်လာကတည်းက လမ်းဘေးမှာ မကြာခဏ တွေ့ရတာက အမှိုက်ပုံတွေပါ။ ဘုရားတွေနား နီးလာလေလေ၊ လမ်းဘေးက အမှိုက်ပုံကြီးတွေက ကြီးလာလေလေပါ။ အဲဒီ အမှိုက်ပုံကြီးများ နဘေးမှာပဲ ဈေးသည်တွေ ဈေးရောင်းနေကြပါတယ်။ ဆိုင်ခန်းတွေ ဖွင့်လှစ်ထားပါတယ်။ ဈေးရောင်းသူတွေနဲ့ ဈေးဝယ်သူတွေကပဲ ဒီအမှိုက်ပုံကြီးတွေကို နေ့စဉ်နဲ့အမျှ ပိုပြီး ကြီးမားစေပါတယ်။ ဂူဘုရားကြီးတွေရဲ့ အတွင်းဘက် ပတ်လည် လျှောက်လမ်းများဟာ ကျယ်ပြန့်ပြီး တိတ်ဆိတ်ပေမည့် ကျင်ငယ်နံ့တွေနဲ့ နံစော်နေပါတယ်။ အချိုးအကွေ့ထောင့်တွေမှာ ကြွပ်ကြွပ်အိပ်စွတ်ထားတဲ့ အမှိုက်တောင်းကလေးတွေ ချထားပေမယ့် အမှိုက်အများစုက တောင်းထဲမှာ မရှိပဲ တောင်းအပြင်ဘက်မှာသာ စုပုံနေပါတယ်။ ကွမ်းတံတွေးနီနီရဲရဲတွေကလည်း အမှိုက်တောင်းထဲမှာရော၊ အပြင်ဘက်မှာပါ ပေကျံညစ်ပတ်နေပါတယ်။ ပုဂံရဲ့ အလှအပကို ညစ်ပတ်မှုတွေက ဆိုးဆိုးဝါးဝါး ဖျက်စီးနေပါတယ်။

ပုဂံရဲ့ လှပမှုကို ဖျက်ဆီးနေတဲ့ အမှိုက်သရိုက်တွေ၊ ညစ်ပတ်မှုတွေအတွက် ဘယ်သူတွေမှာ တာဝန်ရှိပါသလဲ။ အမှိုက်တွေကို အလွယ်တကူစွန့်ပစ်တတ်ကြတဲ့ ခရီးသွားဧည့်သည်တွေ၊ ဈေးသည်တွေ၊ အပေါ့အပါးသွားတဲ့ကိစ္စကို ဂူဘုရားများရဲ့ အုတ်နံရံများဘေးမှာ အလွယ်တကူဖြေရှင်းကြသူတွေ၊ ကွမ်းယာတွေကို အားရပါးရစားပြီး စည်းကမ်းမရှိ နေရာမရွေး ထွေးထုတ်တတ်သူတွေမှာ တာဝန်ရှိပါလိမ့်မယ်။ ပုဂံဘုရားများကို အမှီသဟဲပြု ဘဝရပ်တည်နေကြပြီး၊ ပုဂံကို အခြေပြုလို့ အသက်မွေးဝမ်းကြောင်းနေကြပြီး မျက်စိရှေ့မှာပဲ ကြီးမားနံစော်လာတဲ့ အမှိုက်ပုံကြီးတွေကို ဂရုမစိုက် မျက်နှာလွှဲနေတတ်တဲ့ ဒေသခံပြည်သူတွေမှာ တာဝန်ရှိပါတယ်။ အမှိုက်တွေကို စနစ်တကျမသိမ်းတဲ့၊ အမှိုက်စွန့်ပစ်ရာ နေရာတွေနဲ့ သန့်ရှင်းသပ်ရပ်တဲ့ အိမ်သာတွေကို တည်ဆောက်မပေးတဲ့ ဘုရားဂေါပကအဖွဲ့တွေနဲ့ မြို့အုပ်ချုပ်ရေးအဖွဲ့မှာ တာဝန်ရှိပါတယ်။ ပုဂံဘုရားများက ရတဲ့ ဝင်ငွေကိုသာ မက်မောတတ်ပြီး ပုဂံဘုရားများကို သန့်သန့်ရှင်းရှင်းနဲ့ ခန့်ငြားလှပအောင် ထိန်းသိမ်းနိုင်စွမ်းမရှိတဲ့ အစိုးရမှာ တာဝန်ရှိပါတယ်။

#ကရိန်နော်အပန်းဖြေစခန်း၊ မြစ်ကြီးနား

၂၀၁၅ ခုနှစ်၊ မတ်လထဲမှာ ကချင်ပြည်နယ်၊ မြစ်ကြီးနားမြို့တော်ကို အလည်အပတ်ရောက်ခဲ့ပါတယ်။ ဆရာဦးသန်းဆွေခေါင်းဆောင်တဲ့ ဥတ္တရလမင်းစာပေရောင်းရင်းများက ပို့ဆောင်ပေးလို့ "ကရိန်နော်" အပန်းဖြေစခန်းကိုလည်း ရောက်ခဲ့ပါတယ်။ မြစ်ကြီးနားကနေ မြစ်ဆုံကို သွားတဲ့လမ်းပေါ်က လမ်းခွဲတစ်ခုမှာ တည်ရှိပါတယ်။ မြစ်ဆုံဒေသမှာ မေခမြစ်နဲ့ မလိခမြစ်တို့ ပေါင်းစုံကြပြီးတဲ့နောက် ဧရာဝတီမြစ်ကြီးရယ်လို့ စတင်ဖြစ်ပေါ်လာပါပြီ။ မြစ်ဆုံက စတင်စီးဆင်းလာတဲ့ ဧရာဝတီမြစ်ဖျားပိုင်း ကမ်းနဘေးမှာ တည်ရှိတဲ့ ကရိန်နော်ဟာ အင်မတန်လှပတဲ့ အပန်းဖြေစခန်းဖြစ်ပါတယ်။ သိပ်ပြီး မနက်လှတဲ့ ကမ်းနဖူးစောက်စောက်ကနေ ဆင်းပြီး ရေစပ်က ကျောက်တုံးကျောက်ဆောင်တွေကြားမှာ လမ်းလျှောက်ရတာ ပျော်စရာပါ။ ဧရာဝတီမြစ်ရေကလည်း အေးစက်လှပါတယ်။ မြစ်ကမ်းပါးမှာ ရေက လမ်းလျှောက်သွားလို့ရအောင် တိမ်ပြီး ခပ်လှမ်းလှမ်းက ကျွန်းလိုဖြစ်နေတဲ့ ရေလယ်ခေါင် ကျောက်ဆောင်ကျောက်တန်းတွေပေါ်မှာ ပျော်ပွဲစားနေကြသူတွေ၊ ချစ်သူစုံတွဲတွေ အများကြီး တွေ့ခဲ့ရပါတယ်။

ဒီမှာလည်း ကရိန်နော်ရဲ့ အလှအပနဲ့ ယှဉ်တွဲတည်ရှိနေတဲ့ အမှိုက်သရိုက်တွေကို တွေ့ရပြန်ပါတယ်။ ကမ်းခြေက ကျောက်ဆောင်တွေကြားမှာ၊ သဲသောင်ပြင်ပေါ်မှာ၊ ရေစပ်မှာ အပန်းဖြေပျော်ပွဲစားကြသူတွေ လွှင့်ပစ်ထားတဲ့ အစားအသောက်အကျွင်းအကျန်တွေ၊ ပလပ်စတစ်အိပ်တွေ၊ ငှက်ပျောသီးခွံတွေ၊ ဆေးလိပ်တိုတွေ၊ စီးကရက်ဗူးခွံတွေ၊ အချိုရည်ပုလင်းတွေ အများကြီး တွေ့ရပါတယ်။ တချို့နေရာတွေမှာဆို ယင်တလောင်းလောင်း၊ ခြင်တလောင်းလောင်းနဲ့ပါ။ အနံ့အသက်ကလည်း မကောင်းပါ။

ကရိန်နော်ရဲ့ အလှအပကို ဖျက်စီးနေတဲ့ အမှိုက်သရိုက်တွေ၊ ညစ်ပတ်မှုတွေအတွက် ဘယ်သူ့မှာ တာဝန်ရှိပါသလဲ။ အမှိုက်တွေကို အလွယ်တကူ စွန့်ပစ်ကြတဲ့ ပျော်ပွဲစားသူတွေမှာ တာဝန်ရှိပါတယ်။ အခကြေးငွေကောက်ခံတဲ့ ပုဂ္ဂလိကပိုင် အပန်းဖြေစခန်းဖြစ်ရက်နဲ့၊ စားသောက်ဆိုင်တွေလည်း ဖွင့်လှစ်ရောင်းချနေရက်နဲ့ ဒီအမှိုက်တွေကို မရှင်းလင်း၊ မသိမ်းဆည်းတဲ့ အပန်းဖြေစခန်းအုပ်ချုပ်သူတွေမှာ တာဝန်ရှိပါတယ်။ အမှိုက်တွေကို အလွယ်တကူ စည်းကမ်းမဲ့မစွန့်ပစ်ဖို့ စတဲ့ နိုင်ငံကြီးသားကျင့်ဝတ်တွေကို သင်ကြားမပေးတဲ့ ပညာရေးစနစ်မှာ တာဝန်ရှိပါတယ်။

#နေပြည်တော်ရုပ်ရှင်ရုံ၊ ရန်ကုန်

၂၀၁၅ ခုနှစ်၊ ဧပြီလဆန်းမှာပါ။ ရန်ကုန်ရောက်တုံး ရုပ်ရှင်ကြည့်မယ်ဆိုပြီး ဆူးလေဘုရားလမ်းက နေပြည်တော်အဆင့်မြင့်ရုပ်ရှင်ရုံကြီးဆီ ရောက်ခဲ့ပါတယ်။ အင်ဆားဂျင့် (Insurgents) ဆိုတဲ့ ရုပ်ရှင်ကားကို သုံးဖက်မြင်မျက်မှန် (3-D Glasses) နဲ့ ကြည့်ရတာပါ။ ရုပ်ရှင်ဇာတ်ကားက စိတ်လှုပ်ရှားစရာပါ။ ရုပ်ရှင်ရုံကလည်း အဆင့်မြင့်ပါတယ်။ ခန်းခန်းနားနားရှိပါတယ်။ လေအေးစက်ကလည်း ကောင်းပါတယ်။ အပေါ်ထပ်မှာ ထိုင်ခုံတွေကလည်း သားသားနားနားပါ။ ဟိုတုံးကလို ထိုင်ခုံကနေ ကြမ်းပိုးကိုက်ခံရတာမျိုး မရှိတော့ပါ။

ဒါပေမယ့်လည်း ရုပ်ရှင်ရုံရဲ့ အလှအပ၊ ရုပ်ရှင်ဇာတ်ကားရဲ့ ကောင်းခန်းတွေကို ရုပ်ရှင်ရုံထဲက အကောင်းစားထိုင်ခုံမှာ ထိုင်ပြီး လက်ကိုင်ဖုန်းနဲ့ ဖုန်းပြောနေတဲ့ လူတစ်ယောက်က ဖျက်ဆီးလိုက်ပါတယ်။ ရုံထဲမှာ အတူကြည့်နေတဲ့ ပရိသတ်တွေကို လုံးဝဂရုမစိုက်ပဲ အချိန်အတော်ကြာ ကျယ်ကျယ်လောင်လောင် ဖုန်းပြောနေတာ ဇာတ်လမ်းထဲက သရုပ်ဆောင်တွေရဲ့ စကားပြောသံတွေကို ဖုန်းလွှမ်းသွားပါတယ်။

ဒီလိုနဲ့ပဲ ရုပ်ရှင်ပြီးပါပြီ။ မီးဖွင့်လိုက်တာနဲ့ ရုပ်ရှင်ကြည့်သူတွေ အလုအယက် ရုံပြင်ကိုထွက်ကြပါတယ်။ အဲဒီမှာ ကျနော် တအံ့တဩတွေ့လိုက်ရတာက ထိုင်ခုံတွေပေါ်မှာ၊ ခုံကြားလမ်းတွေပေါ်မှာ ရုပ်ရှင်ကြည့်သူတွေ ချန်ထားရစ်ခဲ့တဲ့ အမှိုက်တွေပါ။ နေကြာစေ့ခွံတွေ၊ ဇီးထုတ်အခွံတွေ၊ ကိုကာကိုလာဗူးခွံတွေဟာ နေပြည်တော်ရုပ်ရှင်ရုံကြီးရဲ့ အပေါ်ထပ်မှာ ပြည့်နှက်နေပါတယ်။

နောက်ပွဲချိန်မစခင်မှာ ရုပ်ရှင်ရုံဝန်ထမ်းများက ဒီအမှိုက်တွေကို သိမ်းဆည်းကြမှာပါ။ ဒါပေမယ့် အစကတည်းက ရုပ်ရှင်ကြည့်သူတွေက ဒီအမှိုက်တွေကို စည်းကမ်းမဲ့ မပစ်ခဲ့ကြရင် ပိုကောင်းမှာပါ။ ကိုယ့်အမှိုက်ကိုယ်သိမ်းပြီး ရုံအပြင်ဘက်က အမှိုက်ပုံးထဲ တာဝန်သိသိ ထည့်ကြရင် ကောင်းမှာပါ။ အခုတော့ အဆင့်မြင့်ရုပ်ရှင်ရုံကြီးရဲ့ အလှအပကို အဆင့်သိပ်မမြင့်ကြတဲ့ စည်းကမ်းမဲ့ အမှိုက်ပစ်သူများရဲ့ ညစ်ပတ်မှုက ဖျက်ဆီးလိုက်ကြပါတယ်။

#အလှအပနှင့် ညစ်ပတ်ခြင်း

ကျနော်တို့ တိုင်းပြည်မှာ အလှအပကို ပြည့်ပြည့်ဝဝ ခံစားခွင့်က နည်းလှပါတယ်။ အများပြည်သူနဲ့ သက်ဆိုင်တဲ့ လှပတဲ့ နေရာတိုင်းမှာ၊ လှပအောင် ဖန်တီးထားတဲ့ နေရာတိုင်းမှာ လူတွေဖန်တီးလို့ ဖြစ်တဲ့ အပျက်အဆီးတွေ၊ ညစ်ပတ်မှုတွေက ယှဉ်ပြိုင်နေရာယူထားကြတတ်ပါတယ်။ ဘတ်စ်ကားသစ်ကြီးများရဲ့ လှပသစ်လွင်တဲ့ ဆိုဖာကြီးတွေဟာ ဓားသရမ်းသူတွေရဲ့ ထိုးခွဲဖျက်ဆီးတာခံရတတ်ပါတယ်။ သစ်လွင်စည်ကားတဲ့ ပန်းဥယျဉ်တွေမှာ ကွမ်းတံတွေးတွေ၊ မူးယစ်သေစာတွေ၊ ဘီယာပုလင်းခွံတွေ ပြည့်နှက်နေတတ်ပါတယ်။ ပုဂ္ဂလိကဓာတ်ဆီအရောင်းဆိုင်ကြီးတွေဟာ ကြီးမားခန့်ငြားပြီး အိမ်သာတွေမှာတော့ အညစ်အကြေးတွေ ပြည့်လျှံနေတတ်ပါတယ်။ မနေ့တစ်နေ့ကမှ တခန်းတနားဖွင့်လှစ်ခဲ့တဲ့ ကုန်းကျော်တံတားအသစ်ကြီးတွေရဲ့ နံရံတွေမှာ ညစ်ညမ်းစာတွေ ရေးထားတတ်ပါတယ်။ ဆေးမှုတ်ပြီး ပုံတွေရေးဆွဲထားတတ်ပါတယ်။ အဆင့်အတန်းမြင့်မားပြီး ဈေးနှုံးအလွန်ကြီးတဲ့ စားသောက်ဆိုင်ကြီးတွေရဲ့ မီးဖိုချောင်မှာ လက်မဆေးတဲ့ စားဖိုမှူးတွေ ရှိတတ်ပါတယ်။ ဟိုတယ်ကြီးက ခန်းနားလှပပေမယ့် အခန်းထဲမှာတော့ မသန့်ရှင်းတဲ့အနံ့တွေ၊ ခြင်တွေ၊ ဖြုတ်တွေ၊ ပုရွက်ဆိတ်တွေရှိတတ်ပါတယ်။ အင်မတန်ခန့်ညားလှပတဲ့ တက္ကသိုလ်ကြီးတွေဟာ လူသူကင်းဝေးတဲ့ လယ်ကွင်းတွေထဲမှာ အထီးကျန် တည်ရှိနေတတ်ပါတယ်။ အင်မတန် ခန့်ငြားလှပတဲ့ လွှတ်တော်အဆောက်အအုံကြီးတွေမှာ ခေါင်မိုးကမလုံပဲ မိုးယိုနေတတ်ပါတယ်။ သန့်ရှင်းလတ်ဆတ်သော မြေပဲဆီအကောင်းစားလို့ လှလှပပတံဆိတ်တတ်ထားပေမယ့် စားအုန်းဆီတွေ ဖြစ်နေတတ်ပါတယ်။ ကျန်းမာရေးအတွက် ကောင်းမွန်လှပါတယ်လို့ လှလှပပကြော်ငြာထားတဲ့ ရေသန့်ဗူးထဲမှာ မသန့်ရှင်းတဲ့ ရေတွေ ပါဝင်တတ်ပါတယ်။

လှပမှုနဲ့ ညစ်ပတ်ခြင်းတို့ တစ်ခါတစ်ရံမှာ သဘာဝကျကျ ယှဉ်တွဲရှိနေတတ်ပါတယ်။ စပါးပင်တွေ လေတိုက်တိုင်း ယိမ်းနွဲ့နေကြတဲ့ လယ်ကွင်းကြီးက တကယ့်အလှပါ။ အဲဒီ လှပတဲ့ လယ်ကွင်းထဲမှာ ရွှံ့နွံတွေ၊ နွားချေးပုံတွေ တွေ့ရနိုင်ပါတယ်။ ဒါ သဘာဝကျပါတယ်။ ရွှံ့နွံတွေ၊ နွားချေးပုံတွေကြောင့် စပါးခင်းကြီးရဲ့ အလှ လျော့မသွားပါ။ မနက်ခင်း စာသင်ခန်းထဲမှာ  ကျောင်းသားလေးတွေ ညီညာဖျဖျ စာအံနေကြတဲ့ မြင်ကွင်းဟာ တကယ့်အလှပါ။ ကျောင်းသားလေးတွေထဲမှာ နှပ်ချီးတွဲလောင်းနဲ့ ကလေးတွေ၊ အိပ်ရေးမဝလို့ သမ်းနေသူလေးတွေ ပါဝင်နေနိုင်ပေမယ့် စာသင်ခန်းလေးရဲ့ အလှကို တန်ဘိုးမလျော့စေပါ။ ကောက်ရတဲ့ ပိုက်ဆံအိပ်ကို ပိုင်ရှင်ထံပြန်ပေးတဲ့ အလုပ်သမားလေးရဲ့ ရိုးသားမှုဟာ တကယ့်အလှပါ။ ဒီအလုပ်သမားလေးဟာ အရုပ်ဆိုးလေးဖြစ်ဦးတော့၊ သူ့ရဲ့ရိုးသားမှုကြောင့် သူ့ထက်လှသူ မရှိနိုင်ပါ။

#လမ်းပေါ်ရောက်လာတဲ့ အလှအပများ

အခုတော့ ဖန်တီးထားတဲ့ အလှအပတွေ လမ်းပေါ်ရောက်လာခဲ့ပါပြီ။ ရွေးကောက်ပွဲမှာ အနိုင်ရရှိရေး ပြည်သူလူထုကို မဲဆွယ်ဖို့ လှလှပပပြင်ဆင်ထားတဲ့ လွှတ်တော်ကိုယ်စားလှယ်လောင်းတွေ လှလှပပပြင်ဆင်ထားတဲ့ ကြော်ညာကားကြီးတွေနဲ့၊ လှလှပပရိုက်နှိပ်ထားတဲ့ မဲဆွယ်စာတမ်းတွေနဲ့၊ လှလှပပမိန့်ခွန်းတွေကို ပြောဖို့ လမ်းပေါ်ကို ရောက်လာကြပါပြီ။ သူတို့တွေ အမှန်တကယ် လှကြပါရဲ့လား။ သူတို့တွေဟာ တိုင်းပြည်ရဲ့ အလှအပတွေကို အညစ်အကြေးကင်းကင်းစင်စင်နဲ့ သန့်ရှင်းစွာလှပလာအောင် စွမ်းဆောင်ပေးနိုင်ကြမှာလား။ သူတို့ကိုယ်တိုင်ကရော အညစ်အကြေးကင်းစင်ရဲ့လား။  ပြည်သူများက ခွဲခြားစစ်ဆေးကြဖို့ လိုအပ်ပါတယ်။ သူတို့မှာ ကပ်ညိနေနိုင်တဲ့ အညစ်အကြေးတွေကို မြင်အောင်ကြည့်တတ်ဖို့ လိုပါတယ်။ လှတိုင်း မယုံကြည်ရသလို မလှပေမည့် တန်ဘိုးကြီးသူတွေ ရှိတတ်ပါတယ်။

ငွေကြေးအလွန်အကျွံသုံးစွဲနိုင်တဲ့ နိုင်ငံရေးပါတီကြီးများက နိုင်ငံတဝှမ်းမှာ ခန်းခန်းနားနား လှလှပပ မဲဆွယ်စည်းရုံးနိုင်ကြမှာ ဖြစ်ပေမယ့် အဲဒီပါတီကြီးများရဲ့ ကိုယ်စားလှယ်လောင်းများကတော့ လူထုဘဝကို နားလည်စာနာတဲ့၊ လူထုဘက်က အမြဲတမ်းရပ်တည်တဲ့ အမှန်တကယ် နှလုံးသားလှသူများ ဖြစ်ချင်မှ ဖြစ်ပါလိမ့်မယ်။ လူထုရဲ့ အကျိုးစီးပွါးထက် ပါတီအာဏာရှင်ရဲ့ အမိန့်ကိုသာ ဦးစားပေးဆောင်ရွက်ကြမယ့် နာခံတတ်သူများသာ ဖြစ်နေနိုင်ပါတယ်။ ငွေကြေးချို့တဲ့သော ပါတီငယ်များ၊ တသီးပုဂ္ဂလကိုယ်စားလှယ်လောင်းများကတော့ ခန်းခန်းနားနား ကျယ်ကျယ်ပြန့်ပြန့် စည်းရုံးနိုင်ကြမှာ မဟုတ်ပါ။ ဒါပေမယ့် အဲဒီပါတီငယ်များနဲ့ တသီးပုဂ္ဂလ ကိုယ်စားလှယ်လောင်းများဟာ လူထုဘဝအတွက် အမှန်တကယ်လှပသူများလည်း ဖြစ်နေနိုင်ပါတယ်။ မြန်မာပြည်သူများအနေနဲ့ လှပခန့်ငြားတဲ့ ပါတီအလံများ၊ တောက်ပခန့်ငြားတဲ့ ပါတီတံဆိတ်များအောက်က လွှတ်တော်ကိုယ်စားလှယ်လောင်းများရဲ့ တကယ့်အလှအပကို ရှာဖွေဆန်းစစ်နိုင်ကြပါစေ။ သန့်ရှင်းလတ်ဆတ်သော မြေပဲဆီလို့ လှလှပပတံဆိတ်တပ်ပြီး လိမ်ညာထားတဲ့ စားအုန်းဆီတွေကို စစ်ဆေးဖယ်ရှား ငြင်းပယ်နိုင်ကြပါစေလို့ ဆုတောင်းပေးလိုက်ပါတယ်။

အောင်ဒင်
စက်တင်ဘာလ ၁၄ ရက်၊ ၂၀၁၅