မေး ။ ။ အခု ကိုအောင်ဒင် ပြောပြသွားတာဆိုရင် ကျွန်တော်တို့က ဒီ ၂ဝ၁၅ ရွေးကောက်ပွဲလည်း အရေးကြီးတယ်။ ၂ဝ၁၅ ရွေး ကောက်ပွဲမှာ ရွေးချယ်တင်မြှောက်လိုက်မယ့် ပြည်သူ့လွှတ်တော် ကိုယ်စားလှယ်တွေရဲ့ အခန်းကဏ္ဍတွေကလည်း အတော်အရေးပါ တာကို တွေ့လိုက်ရပါတယ်။ ကျွန်တော်တို့ဆီမှာတော့ အတွေ့အကြုံ နည်းသေးတယ်ပေါ့နော်။ အဲဒီတော့ ပြည်သူ့လွှတ်တော် ကိုယ်စား လှယ်တစ်ယောက်ကို ရွေးချယ်တဲ့အခါမှာပေါ့ နိုင်ငံရေးပါတီတွေ အနေနဲ့ ဘယ်လိုအချက်အလက်တွေမှာ The Criteria ပေါ့။ ဘယ်ပေါ်မှာမူတည်နေပြီး ရွေးချယ်သင့်သလဲပေါ့။ အဲဒါလေးလည်း အကြံပြုပါဦး။ ဘာလို့လဲဆိုတော့ ကိုအောင်ဒင်က အမေရိကန် ပြည်ထောင်စုမှာနေတာလည်း အတော်ကြာပြီး၊ အမေရိကန်လွှတ် တော်နဲ့လည်း တော်တော်နီးနီးကပ်ကပ် ဆက်ဆံဖူးတဲ့ အခါကျတော့၊ လေ့လာဖူးတဲ့အခါကြတော့ လွှတ်တော်ကိုယ်စားလှယ်ရဲ့ ရွေးချယ်ပုံ၊ ရွေးချယ်နည်းက ဘယ်အချက်တွေပေါ်မှာ ဦးတည်ပြီးတော့ အဓိက စံထားပြီးတော့ ရွေးချယ်သင့်သလဲဆိုတာလေးလည်း ကျွန်တော် တို့နိုင်ငံရဲ့အနေအထားလေးပေါ်မှာ အခြေပြုပြီးတော့ ပြောပေးပါဦး။
အောင်ဒင်။ ။ ယေဘုယျအားဖြင့်တော့ ပါတီကိုယ်စားပြုလွှတ်တော် ကိုယ်စားလှယ်လောင်းတွေမှာ မူကနှစ်ခုရှိမယ်။ တစ်ခုကျတော့ ပါတီက ချမှတ်ထားတဲ့မူ၊ ပါတီက ချမှတ်ထားတဲ့မူဆိုတာ တစ်နိုင်ငံ လုံးနဲ့ဆိုင်တယ်နော်။ ဒီပါတီအာဏရလို့ရှိရင် တိုင်းပြည်နဲ့ ပတ်သက် ပြီးတော့ စီးပွားရေး၊ လူမှုရေး၊ ပညာရေး၊ ကျန်းမာရေး ဘယ်လို အပြောင်းလဲတွေလုပ်မယ်၊ ဘယ်လို ပြင် ဆင်မယ်၊ ဒါက ပါတီရဲ့မူပေါ့။ အဲဒီမူ တွေအားလုံးကို ပါတီကရွေးချယ်ထား တဲ့ကိုယ်စားလှယ်လောင်းက လက်ခံပြီး သားဖြစ်ရမယ်။ ဒါက တစ်အချက်ပေါ့ နော်။ နှစ်အချက်ကသူယှဉ်ပြိုင်မယ့် မဲ ဆန္ဒတွေရဲ့ လိုအပ်ချက်။ အဲဒါကျတော့ သူကိုယ်တိုင်ဆင်းပြီးတော့ လေ့လာသုံး သပ်ရမယ်၊ ကြည့်ရမယ်။ သူရောက်နေ တဲ့ သူကိုယ်စားပြုမယ့် ပြည်သူတွေက ဘာကိုလိုအပ်သလဲ။ ပြည်သူတွေရဲ့အသံ ကို နားထောင်ရမယ်။ သူကိုယ်စားပြု မယ့် မဲဆန္ဒတွေမှာ ဘာတွေလိုအပ်သလဲ၊ လူမှုရေး၊ စီးပွားရေး၊ ပညာရေး၊ ကျန်း မာရေး ဘာတွေလိုအပ်သလဲ။ အဲဒါတွေ သူသိရှိနားလည်ဖို့လိုတယ်။ သူရဲ့တာဝန် က သူဟာရွေးကောက်ပွဲမဲဆွယ် စည်းရုံး တဲ့ကာလမှာ လူထုကို ပါတီရဲ့နိုင်ငံလုံး ဆိုင်ရာမူဝါဒတွေကို ကျေကျေညက် ညက် ရှင်းပြနိုင်ရမယ်။ အထူးသဖြင့်ပေါ့ ဗျာတို့ပါတီရဲ့ မူဝါဒသည်လိုချ မှတ်ထား တယ်။ ဒီမူဝါဒက ဘာလို့လက်ရှိ မူဝါဒ ထက်ကောင်းသလဲဆိုတာကို သူကိုယ် တိုင်ကသိရှိရမယ်။ အဲတော့ အဓိက ဘာဖြစ်မလဲဆိုတော့ လက်ရှိ စနစ်ကြီးရဲ့အားနည်းချက်ကို သိရမယ်။ အဲဒီအားနည်းချက်ကိုဘယ် လိုပြင်မလဲ။ ငါတို့ပါတီ အာဏာရလို့ရှိရင် ဘယ်လိုပြင်မလဲဆိုတဲ့ မူဝါဒအသစ်ကို နားလည်ရမယ်။ အဲဒီမူဝါဒအသစ်ကိုမဲဆန္ဒရှင်လူ အများ လက်ခံယုံကြည်အောင် စည်းရုံးနိုင်စွမ်းရှိရမယ်။
နောက်တစ် ချက်ကတော့ ဒီဒေသဆိုင်ရာ မဲဆန္ဒရှင်တွေရဲ့ လိုအပ်ချက်တွေကို သူဘယ်လိုဖြည့်ဆည်းမလဲ။ အဲဒီမှာလည်း ကတိတစ်ခုဆိုတာ အလွယ်တကူ မပေးသင့်ဘူး။ မဖြစ်နိုင်တာကို ကတိမပေးရဘူး။ တကယ်လည်း အာဏရလည်းရရော ကတိကို အကောင်အထည် မဖော်နိုင်ခဲ့တဲ့ နိုင်ငံရေးသမားတွေ အများကြီး အများကြီး ရှိပါ တယ်။ ဒါဟာ နိုင်ငံတကာမှာရှိတယ်။ ကျွန်တော်တို့ဆီမှာ လူထုက အဲဒါကိုစောင့်ကြည့်နေတယ်။ အဲတော့ ဖြစ်နိုင်လို့ရှိရင် ရိုးရိုး သားသားပေါ့ဗျာ။ ကတိကိုပေးနိုင် သလောက်ပေး၊ မပေးနိုင် တာ မပေးနဲ့။ လူထုက ဒါကိုကြည့်မယ်။ လူထုက(၁)အချက် ပါတီ နောက်ခံကိုကြည့်မယ်၊ နောက်ပါတီက ချမှတ်ထား တဲ့ ပေါ်လစီက ဘာလဲ။ ဒီပါတီအာဏာရလို့ရှိရင် တိုင်းပြည်ကိုသူတို့ဘယ်လို ပြောင်းမလဲ။ အဲဒါကို လူထုက ဘယ် လောက်ယုံကြည်မလဲပေါ့၊ အဲဒါကိုကြည့်မယ်။ ဒုတိယအချက်က ပုဂ္ဂိုလ်ရေးဆိုင် ရာ။ နောက် တစ်ချက်ကတော့ဗျာ အရေးကြီးတာ ကိုယ်ကျင့်တရားပဲ။ ကိုယ်စား လှယ်လောင်းသည်ကိုယ်ကျင့်တရားဖြူစင်သူ၊ ဖြောင့်မတ်သူလည်း ဖြစ်ရမယ်။ ကျွန်တော်က ဘုရားတကာ၊ ကျောင်းတကာဖြစ်ရမယ်လို့ ပြောတာမ ဟုတ်ပါဘူး။ သူ့ရဲ့ငါးပါးသီလလုံခြုံတာကို ဆိုလိုတာ မဟုတ်ဘူး။ ဒါပေမဲ့ ရိုးရိုးသား သားဖြူဖြူစင်စင်နဲ့ ရပ်ရေးရွာရေးကို အများအကျိုးကို သယ်ပိုးထမ်းရွက်နိုင်တဲ့ သူ အဲဒီလိုဖြစ်ရမယ်။ နောက်တစ်ခါ တစ်စုံတစ်ရာ ကျောထောက်နောက်ခံနဲ့ ဝင်ပြိုင်နိုင်တဲ့လူဆိုလည်း၊ တစ်စုံတစ်ရာ ကျောထောက်နောက်ခံဆိုတာအင်မတန် ပိုက်ဆံချမ်းသာတဲ့ ခရိုနီသူဌေးကြီးလည်း ဖြစ်ချင်ဖြစ်မယ်။ သူတို့ရဲ့ မိသားစုဝင် တစ် ယောက်လည်း ဖြစ်ချင်ဖြစ်မယ်။ ပြည်သူ့ စစ်လို့ခေါ်တဲ့ လက်နက်ကိုင် တပ်ဖွဲ့တွေ ရဲ့အကြီးအကဲလည်း ဖြစ်မယ် . . . စသည်စသည်ဖြင့်ပေါ့၊ ကြီးမားသော သြဇာရှိ လက်ရှိ အာဏာရှိ ပုဂ္ဂိုလ်များရဲ့ အမျိုးအနွယ်လည်း ဖြစ်ချင်ဖြစ်မယ်။ အဲဒီ လိုမျိုးကျောထောက်နောက်ခံအားကောင်း တဲ့သူ၊ တစ်စုံတစ်ရာနဲ့ ရွေးကောက်ပွဲဝင်ဖို့ ကြိုးစားတဲ့ ပုဂ္ဂိုလ်များကို ပြည်သူလူထုက ပြတ်ပြတ်သားသား ငြင်းပယ်သင့်ပါ တယ်။ အဲဒီတော့အဓိကကိုယ် စားလှယ် လောင်းရဲ့ကျင့်ဝတ်သိက္ခာရှိဖို့လိုတယ်။ ကိုယ်စားလှယ်လောင်းရပ် တည်တဲ့ပါတီရဲ့ မူဝါဒတွေကို လေ့လာကြည့်ဖို့လိုတယ်။ ကိုယ်စား လှယ်လောင်းက ဒီဒေသဆိုင်ရာအကျိုးစီးပွားရေးကို ဘာတွေ ဆောင်ရွက်ပေးမယ်ဆိုတဲ့ကတိတစ်ခုကို သေချာနားလည်ဖို့လို တယ်။ ဒါတွေကို ကြည့်ပြီးတော့ပဲ မဲပေးရွေးချယ်ဖို့လိုတယ်။
မေး ။ ။ ကိုအောင်ဒင်အနေနဲ့တော့ ၂ဝ၁၅ ရွေးကောက်ပွဲနဲ့ ပတ်သက်ပြီးတော့လည်း အကောင်းဘက်က ဘာပဲဖြစ်ဖြစ် အကောင်းမြင်တဲ့သဘော တွေ့ရပါတယ်။ ကျွန်တော်တို့ အထူး သဖြင့် ပြုပြင်ပြောင်းလဲရေးကိုလုပ်မယ်လို့ ပြည်သူတွေက အားကိုး တဲ့ ဒီမိုကရက်တစ် အင်အားစုတွေပေါ့။ အထူးသဖြင့် (NLD) ပေါ့။ သူတို့ရဲ့ လက်ရှိအနေအထား၊ နောက်တစ်ခု ဘာတွေဆောင် ရွက်သင့်တယ်လို့များ ထင်ပါသလဲ။
အောင်ဒင်။ ။ အဲဒါတော့ဗျာ။ ကျွန်တော် ပါတီတစ်ခုချင်းကို သီးခြား ကျွန်တော် မပြောချင်တော့ပါဘူး။ ကျွန်တော်မှာ ပြောဖို့လည်း အခွင့်မရှိပါဘူး။ သက်ဆိုင်ရာ ပါတီများက ရွေးကောက်ပွဲမှာ အနိုင် ရချင်တယ်ဆိုရင် သူတို့ဘာလုပ်ရမယ်ဆိုတာကို သူတို့ဘာသာ သူတို့ သိပြီးသားဖြစ်ပါလိမ့်မယ်။ သူတို့ဟာသူတို့ ဒီပါတီရဲ့ ရွေး ကောက်ပွဲဆိုင်ရာ မဟာဗျူဟာနည်းဗျူဟာတွေလည်း ချမှတ် ထား ပြီးသား ဖြစ်ပါလိမ့်မယ်။ ကျွန်တော်တို့ အပြင်ကနေပြီးတော့ ဒီပါတီက ဒီလိုမျိုးလုပ်သင့်တယ်ပြောလည်း သိပ်ပြီးတော့ အဓိပ္ပာယ်မရှိပါဘူး။ သူတို့လည်း လက်ခံချင်မှ လက်ခံလိမ့်မယ်။ အဲဒီတော့ ရိုးရိုးလေးပဲ တွေးကြည့်ရအောင်ပါ။ နိုင်ငံတစ်ဝန်းမှာ လူထုကို ယုံကြည်စိတ်ချမှုရှိအောင် စည်းရုံးနိုင်တဲ့ ပါတီက ကိုယ်စား လှယ်လောင်း တော်တော်များများက ရွေးကောက်ပွဲမှာ အနိုင်ရ မှာပေါ့။ သူတို့ရွေးချယ်တင်မြှောက်မယ့် ကိုယ်စားလှယ်လောင်း များ ကိုယ်၌က အခုနပြောတဲ့ ကျင့်ဝတ်သိက္ခာနဲ့ ပြည့်စုံ တဲ့ပုဂ္ဂိုလ် တွေ ဖြစ်ရမယ်။ ဒါဟာ သူတို့ကိုယ်၌ ကြိုတင်ပြီးတော့ သေချာ စစ်ဆေးဖို့လိုမယ်။ ဒါဟာ တစ်အချက်။ နှစ်အချက်က သက်ဆိုင် ရာပါတီက ချမှတ်ထားတဲ့ ပေါ်လစီတွေကို ဒီကိုယ်စားလှယ် လောင်းတွေက သေချာနားလည်အောင် ရှင်းပြကြပါလိမ့်မယ်။ တတိယအချက်ကကျတော့ သက်ဆိုင်ရာ ကိုယ်စားလှယ် လောင်း လိုအပ်တဲ့ ငွေရေး၊ ကြေးရေး အပါအဝင် အခြားသော အခက်အခဲ တွေကို ပါတီကနေပြီးတော့ တာဝန်ယူ ဖြေရှင်းပေးနိုင်ဖို့လည်း လိုတယ်။ အဲဒီလိုမှ ဒီကိုယ်စားလှယ်လောင်းက ရွေးကောက်ပွဲမှာ စိတ်ချ လက်ချ သူဝင်ပြိုင်လို့ရမှာပါ။
မေး ။ ။ ဟုတ်ကဲ့။ နောက်တစ်ခုကတော့ မြန်မာ့နိုင်ငံရေးမှာ အပွင့်တွေ တော်တော်ခေတ်စားနေတယ်။ လေးပွင့်ဆိုင်၊ ခြောက်ပွင့် ဆိုင် စသဖြင့်ပေါ့။ လောလောဆယ်လည်း ခြောက်ပွင့်ဆိုင်ဆွေးနွေးပွဲ ဒီရက်ပိုင်းမှာ ဖြစ်ပေါ်နိုင်တယ်ဆိုတဲ့ သတင်းတွေကလည်း ခပ်စိပ်စိပ် လေး ကြားလာရပါတယ်။ အဲဒီလို ဆွေးနွေးပွဲတွေရဲ့ အကျိုးသက် ရောက်မှုကိုလည်း ဘယ်လို သဘောထားရှိပါလဲ။
အောင်ဒင်။ ။ ဒိုင်ယာလော့ခ်လို့ပဲ ပြောမယ်နော်။ ဒိုင်ယာလော့ခ်ဆိုတာ ကတော့ ပြဿနာတွေဖြစ်လို့ရှိရင် ဒိုင်ယာလော့ခ်နဲ့ပဲ ဖြေရှင်းကြ မယ်။ အလွယ်တကူပြောလေ့ရှိကြတယ်။ အထူးသဖြင့် Non-Violence အကြမ်းမဖက်လှုပ်ရှားမှုရဲ့ အဓိက ကြွေးကြော်သံဟာ ပြဿနာအားလုံးကို အကြမ်းမဖက်ဘဲ စားပွဲဝိုင်းပေါ်မှာ ဒိုင်ယာ လော့ခ်နည်းနဲ့ ဖြေရှင်းကြတယ်ပေါ့။ ဒါ သိပ်ကောင်းတာပဲ။ ဒိုင်ယာ လော့ခ်ကို ရွေးချယ်ထားတယ်ဆိုလိုရှိရင် သေချာတာကတော့ အရေးကြီးဆုံးက ဒိုင်ယာလော့ခ်မှာ ဆွေးနွေးပွဲမှာပါမယ့် ပုဂ္ဂိုလ် အားလုံးဟာ ဘယ်လောက်ထိညှိနှိုင်းနိုင်မလဲဆိုတာကို ကြိုတင် ပြင်ဆင်ထားဖို့လိုတယ်။ အဲလိုမဟုတ်ဘဲနဲ့ ဒိုင်ယာလော့ခ်ကို သွား မယ်ဆိုရင် ဆွေးနွေးပွဲကိုတော့ ရောက်လာပါရဲ့၊ သို့သော်လည်း တစ်ဖက်နဲ့တစ်ဖက်မှာ ညှိနှိုင်းဖို့၊ ဆွေးနွေးဖို့ ဖြေလျှော့မှု မရှိဘဲနဲ့ နှစ်ဖက်စလုံးက ကိုယ်လိုချင်တာကိုပဲ ရရမယ်ဆိုပြီး တင်းခံထားရင် အဲဒိုင်ယာလော့ခ်က ဘယ်တော့မှ အောင်မြင်မှာ မဟုတ်ဘူး။ အခုလည်း လေးပွင့်ဆိုင်၊ ခြောက်ပွင့်ဆိုင်စသဖြင့်ပေါ့ဒိုင်ယာလော့ခ် တွေပြောတယ်။ ကျွန်တော်ကတော့ ဖြစ်လာရင်တောင် အောင်မြင်ပါ့မလား။ ခြောက်ပွင့်ဆိုင်လည်းဖြစ်နိုင်တာပဲ၊ သို့သော်လည်း အဲဒီလို ခြောက်ပွင့်ဆိုင်ဖြစ်လို့ ရလဒ်ထွက်လာမလားဆိုတာ သိပ်မ သေချာဘူး။ မျှော်လင့်လို့မရဘူး။
ဥပမာတစ်ခု ပြောမယ်ဗျာ။ အမျိုးသားဒီမိုကရေစီအဖွဲ့ချုပ်အနေနဲ့ ဒိုင်ယာလော့ခ် တောင်း တယ်။ တစ်ဖက်မှာ ဒီ ပုဒ်မ ၄၃၆ ပြင်ဆင်ရေးလှုပ်ရှားမှုတွေ လုပ်တယ်။ လူထုဆွေးနွေးပွဲတွေလုပ်တယ်။ အဲဒီမှာ မိန့်ခွန်း တွေပြောတယ်။ အဲဒီမှာအဓိကပြောတာကတော့တပ်မတော် စစ်တန်းလျားကို ပြန်သွားရေးပါပဲ။ ဆိုတော့ ဒိုင်ယာလော့ခ် ပြောထားပေမယ့် ဒိုင်ယာလော့ခ်မှာ သူရဲ့ရပ်တည်ချက်ကဘာဆိုတာကို ဟိုဘက်က မြင်နေရတယ်။ နောက် ဒိုင်ယာလော့ခ် ကို လက်ခံလိုက်ရင်လည်း ဒေါ်အောင်ဆန်းစုကြည်ပြောမှာက 'တပ်မတော်ကို စစ်တန်းလျားပြန်သွား၊ လွှတ်တော်ထဲကထွက်၊ ဒါကိုပဲ ပြောမယ်' လို့ ဟိုဘက်က၊ တပ်မတော်ဘက်က နားလည်ပြီးသား ဖြစ်နေတယ်။ သူတို့က စစ်တန်းလျားကိုပြန်သွားဖို့ အဆင်သင့်မရှိ ဘူးလေ။ သူတို့ကိုယ်တိုင်က လိုအပ်ချက်အရ နိုင်ငံရေးမှာ သူတို့ ဆက်လက်ပါဝင်ဖို့လိုတယ်လို့ သူတို့ယုံကြည်ထားတာပေါ့။ အဲလို အချိန်မှာ ဒိုင်ယာလော့ခ်တော့တောင်းပါမယ်။ ဒိုင်ယာလော့ခ် တောင်းနေတဲ့သူရဲ့ရည်ရွယ်ချက်ကစစ်တပ်ကိုစစ်တန်းလျားပြန်သွား ရေးဆိုလို့ရှိရင်၊ စစ်တပ်ဘက်ကရိုးရိုးလေးပဲစဉ်းစားမယ်။ ဘာလို့ တွေ့မှာတုံး၊ တွေ့ လည်းဘာမှထူးခြားတဲ့ညှိနှိုင်းမှုမရှိဘူးလေ။ အဲဒီ တော့ ဒိုင်ယာ လော့ခ်ဆိုတာပထမတော့ငြင်းမယ်ပေါ့။ မငြင်းပဲတွေ့ တော့လည်း အောင်မြင်မှုဆိုတဲ့ ရလဒ်ကို ကျွန်တော်တို့မြင်ရမှာ မဟုတ်ပါဘူး။ ဒိုင်ယာလော့ခ်ဆိုတာ တကယ်ရိုးရိုးလေး။ ဒီအကြမ်း မဖက်လှုပ်ရှားမှု အားလုံးအတွက် အဖြေရှာရမယ့်နည်းလမ်းလည်း ဖြစ်တယ်။ သို့သော်လည်း ဒိုင်ယာ လော့ခ် နည်းနဲ့ အဖြေရှာမယ် ဆိုလို့ရှိရင် ရသင့်သလောက် ရတာကို လက်ခံပြီးတော့ ပေးသင့် သလောက်လည်းပြန်ပေးရမယ်ဆိုတာကို နားလည်ဖို့ လိုအပ်တယ်။
မေး ။ ။ ဟုတ်ကဲ့ မေးတာလည်း တော်တော်များသွားပါပြီ။ ကိုအောင်ဒင်ပြောတဲ့ အထဲမှာ စစ်တပ်ရဲ့အခန်းကဏ္ဍ ပါလာတာ တွေ့ရပါတယ်။ အဲဒီအခါကျတော့ ကျွန်တော်တို့နိုင်ငံ ရှေ့ဆက် သွားမယ့်အပိုင်းမှာ တပ်ရဲ့အခန်းကဏ္ဍ၊ တပ်ရဲ့အရေးပါပုံတွေကို ကျွန်တော်တို့ ဘယ်လို သဘောထားသင့်သလဲပေါ့။ စစ်တပ်နဲ့ ပတ်သက်တဲ့ သဘောထားလေး ပြောပေးပါဦး။
အောင်ဒင်။ ။ စစ်တပ်နဲ့ ပတ်သက်လို့ ကဗျာ၊ ဒီ အခုလောလောဆယ်မှာ စစ်တပ်က တိုင်းပြည်ရဲ့အုပ်ချုပ်မှုအာဏာရော၊ ဥပဒေပြု အာဏာရော အားလုံးမှာ သူက လွှမ်းမိုးထားတယ်။ အရေးကြီးတဲ့ ကဏ္ဍ လွှမ်းမိုးထားတယ်ဆိုတော့ အရေးကြီးတဲ့နေရာက ပါနေတာပေါ့။ လွှတ်တော်မှာ ဆိုလို့ရှိရင်လည်း ၂၅ ရာခိုင်နှုန်းသော တပ်မတော် သားကိုယ်စားလှယ်တွေရဲ့ထောက်ခံချက်မပါဘူးဆိုလို့ရှိရင်ဖွဲ့စည်းပုံ ဥပဒေကိုပြင်ဆင်နိုင်စရာအကြောင်း မရှိဘူးပေါ့။ စစ်တပ်သည် မြန်မာနိုင်ငံကို အခုချိန်မှာဆက်လက်လွှမ်းမိုးထားဆဲပဲ။ ကျွန်တော် ထင်တယ် နောက်ကာလတစ်ခုလည်း ဆက်လက်လွှမ်းမိုးနေဦးမှာပဲ။ စစ်တပ်သည်အလွယ်တကူနဲ့ နိုင်ငံရေးထဲက ထွက်မှာမဟုတ် ဘူး။
အဲဒီမှာဘာပြန်တွေ့လဲဆိုတော့ဗျာ၊ ကျွန်တော်တို့ ၁၉၄၈ လွတ်လပ်ရေးရပြီးတဲ့ အချိန်ကစပြီးတော့ အခုထိပေါ့၊ ဖြစ်တဲ့ ပြဿနာက တကယ်တော့ အရပ်သားနိုင်ငံရေးသမားများနဲ့စစ်တပ် ကြားမှာ အပြန်အလှန် မယုံကြည်မှုပဲ။ အပြန်အလှန်မယုံကြည်မှု၊ မယုံကြည်မှုကြီးလာတဲ့အခါ မှာတော့ အရပ်သားနိုင်ငံရေးသမား တွေအာဏာရတဲ့အချိန်မှာလည်း စစ်တပ်ကိုတစ်စုံတစ်ရာ နှိမ့်ချ ခဲ့တာ၊ အသုံးချခဲ့တာလည်း ရှိပါတယ်။ အခု စစ်တပ်က အာဏာ ရတဲ့အချိန်မှာ သူတို့က အရပ်သားနိုင်ငံရေးသမားကို မယုံ ဘူး။ မယုံတဲ့အခါမှာ အရပ်သားနိုင်ငံရေးသမားကို ပြန်ပြီးတော့ ချိုးနှိမ် ထားတာရှိတယ်။ အဲတော့စစ်တပ်က ဘယ်အချိန်မှာ နိုင်ငံရေး နယ်ပယ်ကထွက်မလဲဆိုတော့ စစ်တပ်နဲ့အရပ်သားနိုင်ငံရေးသမား တွေ အပြန်အလှန် အတူတကွ ပူးပေါင်းဆောင်ရွက်ရေးနဲ့ အပြန် အလှန်ယုံကြည်မှု ရှိကြတဲ့အချိန် အဲဒီတော့မှပဲ စစ်တပ်က နိုင်ငံရေး နယ်ပယ်ကနေ ထွက်သွားမယ်လို့ ထင်ပါတယ်။ အခု ဖြစ် ရမှာက အရပ်သားနိုင်ငံရေးသမားဘက်က စစ်တပ်နဲ့ပိုပြီးတော့ နားလည် မှုတွေရှိအောင် ယုံကြည်မှုတွေတည်ဆောက်ဖို့ ကြိုးစား သင့်သလိုပဲ စစ်တပ်ကိုယ်၌ကလည်း အရပ်သား နိုင်ငံရေးသမား တွေပေါ်မှာ သည်းခံမှုအတိုင်းအတာ ကြီးကြီးမားမားနဲ့ပူးပေါင်း ဆောင်ရွက် သင့်တယ်၊ နောက်တစ်ခါအပြန်အလှန်နားလည်မှုတွေတည်ဆောက် သင့်တယ်။ ပထမဆုံးပြောလို့ လုပ်လို့ရတာက အခုလွှတ် တော်ထဲ မှာရှိနေတဲ့ စစ်တပ်ကိုယ်စားလှယ်တွေကို ကျွန်တော်က သူတို့ကို လောလောဆယ်မှာ ထွက်သွားလို့ ကျွန်တော်မပြောဘူး။ သို့သော် သူတို့ကိုအမြဲတမ်း ခန့်ထားစေချင်တယ်။ အခုဆို ကာကွယ်ရေး ဦးစီးချုပ်ဘက်က တပ်မတော်ကိုယ်စားလှယ်တွေကို အမြဲတမ်း ပြောင်းလဲမယ့်အစား သက်တမ်း ၅ နှစ်၊ သက်တမ်း တစ်ခုမှာ ဒီကိုယ်စားလှယ်တွေ၊ သူတို့ ကိုယ်တိုင်ခန့်အပ်ထားတဲ့ ကိုယ်စား လှယ်တွေ ၅နှစ် သက်တမ်းအပြည့်ခန့်အပ်ထားစေချင် တယ်။ အဲဒီ ၅နှစ်အတွင်းမှာ ဒီတပ်မတော် ကိုယ်စားလှယ်တွေကို အရပ်သား လွှတ်တော်ကိုယ်စားလှယ်တွေနဲ့ တက်တက်ကြွကြွ ပူးပေါင်း ဆောင်ရွက်ပြီးတော့ အလုပ်အတူတူလုပ်စေချင်တယ်။ အဲဒါမှသာ လျှင်အရပ်ဘက်၊ စစ်ဘက်ဆက်ဆံရေးတိုးတက်လာနိုင်တယ်။ တပ် မတော်ကာကွယ်ရေးဦးစီးချုပ်ကိုယ်၌က သူလည်းတကယ်ကျတော့ဗျာ ပါတီခေါင်းဆောင်ဖြစ်တယ်။ ဘာဖြစ်လို့လဲဆိုတော့လွှတ်တော်ကိုယ်စားလှယ် ၂၅ရာခိုင်နှုန်းရဲ့အကြီးအကဲဆိုတော့ သူကလည်း အဲဒီမှာ နိုင်ငံရေးပါတီခေါင်းဆောင်တစ်ယောက်ဖြစ်သွားတယ်။ သူ့ကိုယ်၌ကလည်း လွှတ်တော်ထဲမှာရှိနေတဲ့ ဒီအရပ်ဘက် နိုင်ငံရေးပါတီများရဲ့ ခေါင်းဆောင်များနဲ့ တွေ့ဆုံညှိနှိုင်းတာတွေ လုပ်သင့်တာပေါ့။ လွှတ်တော်ထဲမှာ ကိုယ်စားလှယ်အချင်းချင်း တွေ့ဆုံ ကြ၊ ညှိနှိုင်းကြပူးပေါင်းဆောင်ရွက်ကြနဲ့ ပါတီခေါင်းဆောင် အချင်းချင်း ပူးပေါင်းဆောင်ရွက်ကြမယ်၊ ညှိနှိုင်းကြမယ်ဆိုလို့ရှိရင် ဘာပဲပြောပြော အရပ်ဘက်စစ်ဘက်ဆိုင်ရာဆင်ဆံရေး ပိုပြီးတော့ တိုးတက်လာတဲ့ လက္ခဏာတွေ့ရမှာပေါ့။ တဖြည်းဖြည်းနဲ့ အဲလို ဆက်ဆံကြမယ်ဆိုလို့ရှိရင် အပြန်အလှန်မယုံကြည်မှုတွေလျှော့ နည်းပြီး တော့ အပြန်အလှန် ယုံကြည်မှုတွေ ပိုတိုးလာမယ့်အနေ အထားရှိတာပေါ့။ ယုံကြည် အောင်လုပ်ကြမယ်ဆိုရင် နှစ်ဖက် စလုံးမှာတာဝန်ရှိတယ်။ အထူး သဖြင့်တော့ စစ်တပ်ဘက်မှာ ပိုပြီး တော့ တာဝန်ရှိတယ်။ စစ်တပ်ကပိုပြီးတော့ ပွင့်လင်းရမယ်၊ စစ်တပ် က ပိုပြီးတော့ တံခါးဖွင့်ပေးရမယ်၊ စစ်တပ်က ပိုပြီးတော့ ဒီအရပ်ဘက်နိုင်ငံရေးသမားဆီကို ရောက်အောင်သွားရမယ်။ ဘာလို့လဲဆိုတော့ လောလောဆယ်မှာ သူကအာဏာကို အဓိကချုပ်ကိုင်ထားတဲ့ အဓိကယန္တရားဖြစ်နေလို့ပါပဲ။
အယ်ဒီတာအဖွဲ့
0 comments:
Post a Comment