၂၀၁၅ ရွေးကောက်ပွဲ၊ ပြည်သူလူထု၏ အခန်းကဏ္ဍနှင့် ရွေးကောက်ပွဲကို စောင့်ကြည့်လေ့လာခြင်း၊ အပိုင်း (၈)

၂၀၁၅ ရွေးကောက်ပွဲ၊ ပြည်သူလူထု၏ အခန်းကဏ္ဍနှင့် ရွေးကောက်ပွဲကို စောင့်ကြည့်လေ့လာခြင်း၊ အပိုင်း (၈)

အောင်ဒင်

(၅/၄) မဲဆန္ဒရှင်များကို လေ့လာခြင်း

မဲဆန္ဒရှင်များရဲ့ လှုပ်ရှားမှုတွေကိုလည်း လေ့လာရမှာဖြစ်ပါတယ်။ မဲဆန္ဒရှင်များဟာ ဆန္ဒမဲပေးရေးနဲ့ ပါတ်သက်ပြီး သေသေချာချာနားလည်ခြင်းရှိမရှိနဲ့ ရွေးကောက်ပွဲမတိုင်မီက ပြုလုပ်ခဲ့တဲ့ မဲဆန္ဒရှင်ပညာပေးရေးလုပ်ငန်းများ အောင်မြင်ခြင်းရှိမရှိကို ရွေးကောက်ပွဲနေ့မှာ အတိအကျသိရမှာပါ။ မဲပေးဖို့ ရောက်လာပြီးမှ မဲစာရင်းမှာ မပါလို့ မဲမပေးရသူတွေ၊ မဲစာရင်းပါ အချက်အလက်များနဲ့ လွဲချော်နေလို့ မဲမပေးရသူတွေ၊ မဲရုံမှားပြီးရောက်လာသူတွေ၊ မဲလာပေးပေမည့် ဘယ်ကိုယ်စားလှယ်လောင်းကို ဘာကြောင့်မဲပေးရမယ်ဆိုတာ သေသေချာချာနားမလည်သူတွေ၊ ကိုယ်နှစ်သက်တဲ့ ကိုယ်စားလှယ်လောင်းကို မဲပေးဖို့ အမှန်တံဆိပ်တုံးကို ဘယ်နေရာမှာ ခပ်နှိပ်ရမယ်ဆိုတာ မသိကြသူတွေ၊ မကောင်းသောစိတ်ထားနဲ့ တစ်ကြိမ်ထက်ပိုပြီး မဲပေးဖို့ ကြိုးစားသူတွေ၊ မဲရုံမှူးနဲ့ မဲရုံအဖွဲ့ဝင်များကို စော်ကားရန်ပြုချင်သူတွေ၊ မဲရုံထဲမှာ မိမိနှစ်သက်တဲ့ ကိုယ်စားလှယ်လောင်းကို မဲပေးဖို့ အခြားမဲဆန္ဒရှင်များကို မဲဆွယ်သူတွေ၊ မဲလက်မှတ်အပေါ်မှာ ပေါက်တတ်ကရရေးခြစ်ပြီး ဖျက်လိုဖျက်ဆီးလုပ်သူတွေ စသဖြင့် တွေ့ကြုံရနိုင်ပါတယ်။ တစ်စုံတစ်ယောက်ရဲ့ ဖိအားပေးမှုကြောင့် ၎င်းတို့ မနှစ်သက်သူကို ကြောက်ရွံ့စိတ်နဲ့ မဲပေးကြရသူတွေကိုလည်း တွေ့နိုင်ပါတယ်။

(၅/၅) မဲရုံ၌ မဲရေတွက်ခြင်းကို လေ့လာခြင်း

မဲဆန္ဒရှင်များအားလုံး မဲပေးပြီးရင်ဖြစ်စေ၊ ညနေ (၄) နာရီထိုးပြီးရင်ဖြစ်စေ မဲရုံမှူးက မဲရုံပိတ်ပြီး မဲရေတွက်ခြင်းလုပ်ငန်းများကို စတင်ဆောင်ရွက်ရမှာ ဖြစ်ပါတယ်။ မဲရုံမှူးဟာ မဲရုံပိတ်ပြီးတဲ့နောက် မဲရေတွက်ခြင်းကို စောင့်ကြည့်လေ့လာဖို့ မဲရုံအဖွဲ့ဝင်များ၊ မဲရုံကိုယ်စားလှယ်များ၊ ကော်မရှင်ကအသိအမှတ်ပြုထားတဲ့ ရွေးကောက်ပွဲစောင့်ကြည့်လေ့လာသူများအပြင် မဲဆန္ဒရှင်ပြည်သူအချို့ကိုလည်း ခွင့်ပြုရမှာဖြစ်ပါတယ်။

ပထမဆုံး မဲလက်မှတ်ထုတ်ပေးသူထံမှာ ကျန်နေသေးတဲ့ မဲလက်မှတ်များကို မဲရုံမှူး၊ မဲရုံအဖွဲ့ဝင်များ၊ မဲရုံကိုယ်စားလှယ်များနဲ့ အများပြည်သူရှေ့မှောက်မှာ ရေတွက်ပြီး မှတ်တမ်းတင်ရပါတယ်။ အဲဒီလက်ကျန်မဲအရေအတွက် မှန်ကန်ကြောင်းကို သက်သေအားလုံးက လက်မှတ်ရေးထိုးပေးရပါမယ်။ အဲဒီ လက်ကျန်မဲအရေအတွက်နဲ့ မဲပုံးများမှ ရေတွက်ရရှိမည့် ဆန္ဒပြုပြီးမဲလက်မှတ်အရေအတွက်နဲ့ ပေါင်းလဒ်ဟာ မဲရုံမဖွင့်မီ မဲရုံမှူးက ပေးအပ်တဲ့ မဲလက်မှတ်အရေအတွက်နဲ့ ကိုက်ညီရပါမယ်။ လက်ကျန်မဲလက်မှတ်များမှာ မဲရုံမှူးရဲ့ လက်မှတ်ရေးထိုးထားရင် တနည်းနည်းနဲ့ ပြန်လည်အသုံးပြုလို့ မရအောင် အဲဒီမဲလက်မှတ်များကို ထိပ်မှ အောက်ဆုံးအထိ ကြက်ခြေခတ်၍ ပယ်ဖျက်ရမှာ ဖြစ်ပါတယ်။

အဲဒီနောက် မဲရုံအတွင်းရောက်ရှိနေသည့် သက်သေများရဲ့ ရှေ့မှောက်မှာ မဲပုံးများဟာ လုံခြုံစွာသော့ခတ်ပိတ်ဆို့ထားတဲ့ အခြေအနေမပျက်ယွင်းကြောင်း စစ်ဆေးပြီး မဲပုံးများကို ဖွင့်ရန်ဖြစ်ပါတယ်။ မဲရုံမှူး (သို့မဟုတ်) မဲရုံမှူးကတာဝန်ပေးတဲ့ မဲရုံအဖွဲ့ဝင်တစ်ဦးက မဲလက်မှတ်များရဲ့ စုစုပေါင်းကို ရေတွက်ရပါမယ်။ ရရှိတဲ့ စုစုပေါင်းအရေအတွက်နဲ့ လက်ကျန်မဲများရဲ့ အရေအတွက် နှစ်ခုပေါင်းရင် မဲရုံမဖွင့်မီမှာ မဲရုံမှူးရဲ့ လက်မှာရှိတဲ့ မဲလက်မှတ်အရေအတွက်နဲ့ ကိုက်ညီရပါမယ်။ မကိုက်ညီရင်ဖြင့် တစ်ခုခု မှားနေပါပြီ။ သက်ဆိုင်ရာ ရပ်/ကျေးကော်မရှင်ခွဲကို ချက်ခြင်းသတင်းပို့ရမှာ ဖြစ်ပါတယ်။ စုစုပေါင်း မဲအရေအတွက် မကိုက်ညီတာတောင်မှ မဲရေတွက်ခြင်းကို ဆက်လက်ဆောင်ရွက်ရန် ဖြစ်ပါတယ်။

နောက်တဆင့်မှာတော့ ကိုယ်စားလှယ်လောင်းများရရှိတဲ့ ဆန္ဒပြုပြီး မဲလက်မှတ်များကို ရေတွက်ခြင်းဖြစ်ပါတယ်။ မဲရေတွက်ရာမှာ မဲရုံမှူးက ရပ်/ကျေးကော်မရှင်ကတဆင့် ရရှိထားတဲ့ ကြိုတင်မဲလက်မှတ်များကို ဦးစွာ ရေတွက်ရမှာ ဖြစ်ပါတယ်။ ပြီးမှ မဲပုံးထဲက လက်မှတ်များကို ရေတွက်ရမှာပါ။ မဲရုံမှူးက မဲလက်မှတ်တစ်ခုချင်းကို အများမြင်အောင်ပြပြီး ခိုင်လုံမဲ (သို့မဟုတ်) ပယ်မဲဆိုတာကို ဆုံးဖြတ်ပါတယ်။ ခိုင်လုံမဲဖြစ်တယ်ဆိုရင် ဆန္ဒပြုထားတဲ့ ကိုယ်စားလှယ်လောင်းအမည်ကို အများကြားအောင် ရွတ်ဖတ်၊ မဲလက်မှတ်ကိုလည်း သက်သေများအားလုံး မြင်တွေ့အောင် ပြပြီး ကိုယ်စားလှယ်လောင်းတစ်ဦးချင်းစီအတွက် သတ်မှတ်ထားတဲ့ ခြင်း/ပုံးထဲကို သက်ဆိုင်ရာမဲလက်မှတ်ကို ထည့်ရမှာဖြစ်ပါတယ်။ မဲလက်မှတ်ဟာ "ပယ်မဲ" ဖြစ်နေရင်လည်း မဲရုံမှူးက ပယ်မဲဖြစ်ကြောင်း သက်သေများ သိရှိနားလည်စေပြီး ပယ်မဲထည့်ရန် သတ်မှတ်ထားသည့် ခြင်း/ပုံးထဲကို ထည့်ရမှာ ဖြစ်ပါတယ်။

မဲလက်မှတ်များအားလုံးကို ကိုယ်စားလှယ်လောင်းအလိုက်ရရှိတဲ့ မဲများနဲ့ ပယ်မဲများ ခွဲခြားပြီးမှ လွှတ်တော်ကိုယ်စားလှယ်လောင်းတစ်ဦးချင်းအလိုက် ရရှိတဲ့ မဲများကို ရေတွက်ရမှာ ဖြစ်ပါတယ်။ အဲဒီလို ရေတွက်ခြင်းကိုလည်း မဲရုံမှူးကိုယ်တိုင် (သို့မဟုတ်) မဲရုံမှူးက တာဝန်ပေးတဲ့ မဲရုံအဖွဲ့ဝင်တစ်ဦးက  စောင့်ကြည့်နေတဲ့ သက်သေအားလုံးရှေ့မှာ ရေတွက်ရမှာဖြစ်ပြီး ကိုယ်စားလှယ်လောင်းများရဲ့ မဲရုံကိုယ်စားလှယ်များကလည်း မိမိတို့နဲ့ သက်ဆိုင်တဲ့ မဲများ မှန်မမှန်စစ်ဆေးနိုင်ကြပါတယ်။ မရေတွက်လိုက်ရတဲ့ မဲလက်မှတ် မရှိအောင် သေချာစေဖို့ ကိုယ်စားလှယ်လောင်း တစ်ဦးချင်းရရှိတဲ့ မဲလက်မှတ်များပေါ်မှာ အမှတ်စဉ်ရေးထိုးဖို့ လိုအပ်ပါတယ်။ တကယ်လို့ အငြင်းပွါးဖွယ်မဲလက်မှတ်များရှိခဲ့ရင် မဲရုံမှူးက ခိုင်လုံမဲ (သို့မဟုတ်) ပယ်မဲအဖြစ် အဆုံးအဖြတ်ပေးနိုင်ပါတယ်။

အဲဒီနောက် သက်ဆိုင်ရာမဲရုံမှ မဲရေတွက်ခြင်းစာရင်းများကို မဲရုံမှူးက သတ်မှတ်ထားတဲ့ ပုံစံစာရွက်(၅) စောင်မှာမှာ ရေးဖြည့်ပြီး လက်မှတ်ရေးထိုးရပါမယ်။ သက်သေများအားလုံးကလည်း အဆိုပါ ရလဒ်စာရင်းများ မှန်ကန်ခြင်းရှိမရှိ စစ်ဆေးပြီး သက်သေအဖြစ် လက်မှတ်ရေးထိုးကြရမှာ ဖြစ်ပါတယ်။  ပုံစံ (၅) စောင်အနက်မှ တစ်စောင်ကို မြို့နယ်ကော်မရှင်ခွဲထံ နဲ့ နှစ်စောင်ကို ရပ်/ကျေးကော်မရှင်ခွဲထံ ပေးပို့ရမှာဖြစ်ပါတယ်။ နောက်တစ်စောင်ကို မဲရုံမှူးရဲ့ လက်ခံအဖြစ် သိမ်းဆည်းထားပြီး နောက်တစ်စောင်ကိုတော့ မဲရုံနံရံမှာ အများပြည်သူသိရှိနိုင်ရန် ကပ်ထားရမှာ ဖြစ်ပါတယ်။

မဲရုံမှူးဟာ ကျန်ရှိနေတဲ့ မဲလက်မှတ်များ၊ ကိုယ်စားလှယ်လောင်းတစ်ဦးချင်းအလိုက် ရရှိတဲ့ မဲလက်မှတ်များ၊ ပယ်မဲများ၊ မဲရုံတွင်အသုံးပြုသော မဲစာရင်းများ စသည်တို့ကို သီးခြားစီ အထုပ်များတွင်ထည့်၍ လုံခြုံအောင် ချိပ်တံဆိပ်ရိုက်နှိပ်ရပါမယ်။ မဲရုံကိုယ်စားလှယ်များကိုလည်း သက်ဆိုင်ရာကိုယ်စားလှယ်လောင်းရရှိတဲ့ ဆန္ဒမဲများကို ထည့်ထားတဲ့အထုပ်မှာ ချိပ်တံဆိပ်ရိုက်နှိပ်ခွင့်ပြုရပါမယ်။ အထုပ်များရဲ့ အပြင်ဘက်မှာ ပစ္စည်းအမျိုးအစား၊ အရေအတွက်၊ ကိုယ်စားလှယ်လောင်းအမည်၊ မဲဆန္ဒနယ်အမည်၊ ရပ်ကွက်/ကျေးရွာအမည်၊ မဲရုံနံပါတ် စတဲ့အချက်အလက်တွေကို ထင်ရှားစွာ ရေးသားရပါမယ်။ အဲဒီနောက် အဲဒီ အထုပ်များအားလုံးကို အိတ်ကြီးတစ်လုံးမှာ စုထည့်ပြီး အိတ်ပေါ်မှာ မဲဆန္ဒနယ်၊ ရပ်ကွက်/ကျေးရွာ၊ မဲရုံအမှတ် စတဲ့အချက်အလက်တွေ ထင်ရှားစွာရေးသားပြီး လုံခြုံအောင် ပိတ်လို့ ချိပ်တံဆိပ်ရိုက်နှိပ်ရပါမယ်။ မဲရုံကိုယ်စားလှယ်များကိုလည်း အိတ်ကြီးပေါ်မှာ ချိပ်တံဆိပ်ရိုက်နှိပ်ခွင့်ပြုရပါမယ်။ အဲဒီနောက် အဲဒီအိတ်ကြီးကို မြို့နယ်ကော်မရှင်အဖွဲ့ခွဲဆီကို အမြန်ဆုံးပေးပို့ရမှာ ဖြစ်ပါတယ်။

ဒီမှာတင် မဲရုံအဆင့်စောင့်ကြည့်လေ့လာခြင်း ပြီးပါပြီ။ မဲရုံစောင့်ကြည့်လေ့လာသူများဟာ မိမိတို့ တာဝန်ကျရာ မဲရုံအလိုက် စောင့်ကြည့်လေ့လာတွေ့ရှိချက်များကို သတ်မှတ်ထားတဲ့ ပုံစံစာရွက်စာတမ်းတွေမှာ ရေးဖြည့်ပြီး မိမိတို့ရဲ့ သက်ဆိုင်ရာအဖွဲ့အစည်းထံ သတ်မှတ်ထားတဲ့ ဆက်သွယ်ရေးလမ်းကြောင်းများကတဆင့် အမြန်ဆုံး အစီရင်ခံတင်ပြရမှာ ဖြစ်ပါတယ်။

(၅/၆) မဲဆန္ဒနယ်အလိုက် စောင့်ကြည့်လေ့လာခြင်း

၂၀၀၈ ဖွဲ့စည်းပုံအခြေခံဥပဒေအရ မြန်မာနိုင်ငံမှာ မြို့နယ်ပေါင်း (၃၃၀) ရှိပြီး ၎င်းမြို့နယ်များအားလုံးဟာ ရွေးကောက်ခံ ပြည်သူ့လွှတ်တော်ကိုယ်စားလှယ် (၃၃၀) နေရာအတွက် မဲဆန္ဒနယ်မြေများ ဖြစ်ကြပါတယ်။ အမျိုးသားလွှတ်တော်က ရွေးကောက်ခံကိုယ်စားလှယ် (၁၆၈) နေရာရှိလို့ အမျိုးသားလွှတ်တော်မဲဆန္ဒနယ်များဟာ မြို့နယ်တစ်ခုထက် ပိုပြီးကျယ်ပြန့်ပါတယ်။ တိုင်းဒေသကြီး/ပြည်နယ်လွှတ်တော်များအတွက် မြို့နယ်တစ်ခုကို ရွေးကောက်ခံလွှတ်တော်ကိုယ်စားလှယ် (၂) နေရာစီသတ်မှတ်ထားပါတယ်။ ဒါကြောင့်မို့ မြို့နယ်ကော်မရှင်ခွဲရဲ့ စုပေါင်း မဲရေတွက်မှုကနေ အနိုင်ရတဲ့ ပြည်သူ့လွှတ်တော်ကိုယ်စားလှယ်နဲ့ တိုင်းဒေသကြီး/ပြည်နယ်လွှတ်တော်ကိုယ်စားလှယ်များကို အတိအကျသိနိုင်မှာဖြစ်ပြီး အနိုင်ရတဲ့ အမျိုးသားလွှတ်တော်ကိုယ်စားလှယ်ကို သိဖို့ ဆက်စပ်မြို့နယ်က မဲစာရင်းနဲ့ ပေါင်းစပ်ကြည့်ရှူရမှာ ဖြစ်ပါတယ်။ အနိုင်ရတဲ့ တိုင်းဒေသကြီး/ပြည်နယ် တိုင်းရင်းသားလွှတ်တော် ကိုယ်စားလှယ်များကိုလည်း တိုင်းဒေသကြီး/ပြည်နယ် တစ်ခုလုံးက မဲများကို စုပေါင်းပြီးမှ သိရှိနိုင်မှာဖြစ်ပါတယ်။

မြို့နယ်အတွင်းက ရပ်ကွက်/ကျေးရွာအုပ်စုများမှာတည်ရှိတဲ့ မဲရုံများက ရလဒ်မဲစာရင်းတွေဟာ မြို့နယ်ကော်မရှင်အဖွဲ့ခွဲရုံးကို ညနေ (၄) နာရီ၊ မဲရုံပိတ်ပြီးတဲ့နောက်ပိုင်းကစပြီး တဖွဲဖွဲရောက်ရှိလာပါလိမ့်မယ်။ ညနေ (၄) နာရီနောက်ပိုင်းမှာ မြို့နယ်ကော်မရှင်ခွဲရဲ့ မဲရေတွက်ခြင်းစတင်ပါတယ်။ မဲရေတွက်ခြင်းကို ဆောင်ရွက်မည့် မြို့နယ်ကော်မရှင်ခွဲ ဥက္ကဋ္ဌနဲ့ အဖွဲ့ဝင်များအပြင် စောင့်ကြည့်လေ့လာဖို့ လွှတ်တော်ကိုယ်စားလှယ်လောင်းများ (သို့မဟုတ်) ၎င်းတို့ရဲ့ ကိုယ်စားလှယ်များ၊ ကော်မရှင်က အသိအမှတ်ပြုထားတဲ့ ရွေးကောက်ပွဲစောင့်ကြည့်လေ့လာသူများ၊ မြို့မိမြို့ဖများ အချိန်မီရောက်ရှိနေဖို့ လိုအပ်ပါတယ်။ မြို့နယ်ကော်မရှင်အဖွဲ့ခွဲဟာ မဲများကို အများပြည်သူ သက်သေများရှေ့မှောက်မှာ ရေတွက်မှတ်တမ်းတင်ရမှာ ဖြစ်ပါတယ်။

မြို့နယ်ကော်မရှင်ခွဲဟာ ပထမဆုံး ကော်မရှင်မှာ ညနေ (၄) နာရီ နောက်ဆုံးထားပြီး လက်ခံရရှိထားတဲ့ ကြိုတင်မဲလက်မှတ်ထုပ်များကို ဖောက်ပြီး မဲလက်မှတ်တစ်ခုချင်းကို အများပြည်သူရှေ့မှောက်မှာ ရေတွက်ရမှာပါ။ ရပ်/ကျေးမဲရုံမှာ မဲရုံမှူးက မဲရေတွက်တဲ့ စနစ်အတိုင်း ရေတွက်ရမှာဖြစ်ပါတယ်။ ကြိုတင်မဲလက်မှတ်များမှ ကိုယ်စားလှယ်လောင်းတစ်ဦးချင်းစီအတွက် ဆန္ဒပြုထားတဲ့ မဲလက်မှတ်များကို ခိုင်လုံမဲဖြစ်မဖြစ် စစ်ဆေးပြီး ခိုင်လုံတယ်ဆိုရင် သက်ဆိုင်ရာကိုယ်စားလှယ်လောင်းအတွက် သတ်မှတ်ထားတဲ့ ခြင်း/ပုံးထဲမှာ ထည့်ပြီး ပယ်မဲများကိုတော့ ပယ်မဲအတွက် သတ်မှတ်ထားတဲ့ ခြင်း/ပုံးထဲ ထည့်ရမှာဖြစ်ပါတယ်။ အဲဒီနောက် ကိုယ်စားလှယ်လောင်းတစ်ဦးစီရဲ့ ခြင်း/ပုံး ထဲက မဲလက်မှတ်များကို အမှတ်စဉ်ထိုး ရေတွက်ပြီး ကိုယ်စားလှယ်လောင်းတစ်ဦးချင်းအလိုက် ရရှိတဲ့ ကြိုတင်မဲအရေအတွက်ကို သတ်မှတ်ထားတဲ့ ပုံစံစာရွက်မှာ ဖြည့်စွက်ပြီး မြို့နယ်ကော်မရှင် ဥက္ကဋ္ဌ၊ အတွင်းရေးမှူးနဲ့ လွှတ်တော်ကိုယ်စားလှယ်လောင်းများ (သို့မဟုတ်) ၎င်းတို့ရဲ့ ကိုယ်စားလှယ်များက မှန်ကန်ကြောင်း သက်သေပြုလက်မှတ်ရေးထိုးရမှာဖြစ်ပါတယ်။

ကြိုတင်မဲများရေတွက်ပြီးတဲ့နောက် ရပ်ကွက်/ကျေးရွာအုပ်စုများရှိ မဲရုံများမှ ပေးပို့လာတဲ့ မဲရုံအလိုက် ရလဒ်များကို သက်ဆိုင်ရာ လွှတ်တော်ကိုယ်စားလှယ်လောင်းများရဲ့ မဲအရေအတွက်စာရင်းမှာ သက်သေများရှေ့မှောက်မှာ စစ်ဆေးထည့်သွင်းရပါမယ်။ မဲရုံအားလုံးက ပေးပို့တဲ့ ရလဒ်များအားလုံးနဲ့ ကြိုတင်မဲရလဒ်များကို ပေါင်းလိုက်တဲ့အခါ လွှတ်တော်ကိုယ်စားလှယ်လောင်းတစ်ဦးချင်းစီအတွက် မဲဆန္ဒနယ်တစ်ခုလုံးမှ ရရှိတဲ့ စုစုပေါင်းမဲအရေအတွက်နဲ့ စုစုပေါင်းပယ်မဲအရေအတွက်၊ စုစုပေါင်းလက်ကျန်မဲအရေအတွက်တွေကို ရပါလိမ့်မယ်။ အဲဒီနောက်ဆုံးရလဒ်များကနေ သက်ဆိုင်ရာမဲဆန္ဒနယ်မှာ အနိုင်ရရှိတဲ့ ပြည်သူ့လွှတ်တော်နဲ့ တိုင်းဒေသကြီး/ပြည်နယ်လွှတ်တော်ကိုယ်စားလှယ်များရဲ့ အမည်နဲ့ ရရှိတဲ့ ထောက်ခံမဲအရေအတွက်ကို မြို့နယ်ကော်မရှင်က ထုတ်ပြန်ကြေညာပေးရမှာ ဖြစ်ပါတယ်။ အရေးနိမ့်တဲ့ ကိုယ်စားလှယ်လောင်းများနဲ့ သူတို့ရရှိတဲ့ မဲအရေအတွက်ကိုလည်း ထုတ်ပြန်ကြေညာပေးရမှာပါ။ ကိုယ်စားလှယ်လောင်းများရရှိတဲ့ စုစုပေါင်းမဲအရေအတွက်နဲ့ ကြိုတင်မဲများ၊ ပယ်မဲများ၊ ကျန်ရှိနေသေးတဲ့ မဲလက်မှတ်များအားလုံးစုစုပေါင်းဟာ မြို့နယ်အတွင်း မဲပေးခွင့်ရှိတဲ့ မဲစာရင်းပါ အရေအတွက်နဲ့ ကိုက်ညီရမှာ ဖြစ်ပါတယ်။ မြို့နယ်ကော်မရှင်ခွဲက ကိုယ်စားလှယ်လောင်းအလိုက် ရရှိတဲ့ မဲအရေအတွက်နဲ့ ပယ်မဲ၊ လက်ကျန်မဲအရေအတွက်ကို သတ်မှတ်ထားတဲ့ ပုံစံ (၃) စောင်မှာ ဖြည့်စွက်ပြီး မြို့နယ်ကော်မရှင်အဖွဲ့ဝင်များ၊ လွှတ်တော်ကိုယ်စားလှယ်လောင်းများ သို့မဟုတ် ၎င်းတို့၏ကိုယ်စားလှယ်များ၊ သက်သေများက မှန်ကန်ကြောင်း လက်မှတ်ရေးထိုးရမှာ ဖြစ်ပါတယ်။ မြို့နယ်ကော်မရှင်က ပုံစံ (၁) စောင်ကို တိုင်းဒေသကြီး/ပြည်နယ်ကော်မရှင်ခွဲထံ အမြန်ဆုံးပေးပို့ရမှာ ဖြစ်ပါတယ်။ တစ်စောင်ကို မြို့နယ်ကော်မရှင်ရဲ့ လက်ခံအဖြစ် သိမ်းစည်းထားရမှာဖြစ်ပြီး တစ်စောင်ကို မြို့နယ်ကော်မရှင်ရုံး နံရံမှာ အများပြည်သူသိရှိအောင် ကြေညာထားရမှာ ဖြစ်ပါတယ်။

တကယ်လို့များ ကိုယ်စားလှယ်လောင်း (၂) ယောက် မဲအရေအတွက် တူနေမယ်၊ အနိုင်အရှုံးမကွဲပြားဘူးဆိုရင် အဲဒီကိုယ်စားလှယ်လောင်း နှစ်ဦးတည်းအတွက် သီးခြားရွေးကောက်ပွဲတစ်ခု ထပ်မံကျင်းပပေးရန် သင့်၊ မသင့် မြို့နယ်ကော်မရှင်က တိုင်းဒေသကြီး/ပြည်နယ်ကော်မရှင်ကို အကြံပြုရမှာ ဖြစ်ပါတယ်။

မြို့နယ်ကော်မရှင်ခွဲရုံးမှာ စောင့်ကြည့်လေ့လာဖို့ တာဝန်ယူရသူဟာ မဲများစတင်ရေတွက်တဲ့ အချိန်မှာ ရပ်ကွက်/ကျေးရွာအုပ်စုများမှ မဲရုံများမှာ တာဝန်ကျတဲ့ မဲရုံစောင့်ကြည့်လေ့လာသူများက ပေးပို့တဲ့ တွေ့ရှိချက်များ၊ မဲရုံအလိုက် ရလဒ်များကို လက်ခံရရှိနေပါလိမ့်မယ်။ ဒါကြောင့် မြို့နယ်ကော်မရှင်ခွဲရဲ့ မဲရေတွက်မှုကို သူလက်ခံရရှိထားတဲ့ မဲရုံအလိုက်ရလဒ်များနဲ့ တစ်ချိန်တည်းမှာ နှိုင်းယှဉ်လေ့လာနိုင်ပါလိမ့်မယ်။ အဲဒီလို နှိုင်းယှဉ်လေ့လာနိုင်အောင်လည်း မဲရုံအလိုက် စောင့်ကြည့်သူများက သူတို့ရဲ့ တွေ့ရှိချက်များကို မြို့နယ်အဆင့် စောင့်ကြည့်သူထံ အမြန်ဆုံး၊ အမှန်ဆုံး ပေးပို့နိုင်ဖို့ လိုအပ်ပါတယ်။ နှိုင်းယှဉ်လေ့လာမှပဲ အမှားအယွင်းရှိရင် မြိုနယ်အဆင့် စောင့်ကြည့်လေ့လာသူက မြို့နယ်ကော်မရှင်ကို ချက်ချင်း တင်ပြနိုင်မှာဖြစ်ပြီး အမှားအယွင်းမရှိရင် မြို့နယ်ကော်မရှင်ရဲ့ ရလဒ်ကြေညာချက်ကို ယုံယုံကြည်ကြည်နဲ့ ထောက်ခံနိုင်မှာ ဖြစ်ပါတယ်။

(ဒီဆောင်းပါးရှည်ကို တူမောရိုးသတင်းဂျာနယ်မှာ ၂၀၁၅ ခုနှစ်၊ ဧပြီလနဲ့ မေလအတွင်းမှာ ဖော်ပြခဲ့ပါတယ်။)